Qatar va AQSH o‘rtasida rekord darajadagi harbiy shartnoma imzolandi: Tramp yangi davr boshlanganini ta’kidladi

AQSH va Qatar munosabatlari yangi bosqichga ko‘tarilmoqda. AQSH prezidenti Donald Tramp Fors ko‘rfazi davlatlariga qilgan safarining doirasida Qatarga tashrif buyurdi va ikki mamlakat o‘rtasida bir qator muhim kelishuvlarga erishildi.

Donald Tramp kecha Qatarda joylashgan Amerikaning yirik harbiy bazasi – Al-Udeyd aviabazasida nutq so‘zlab, ikki davlat o‘rtasidagi harbiy va iqtisodiy hamkorliklarni yangi bosqichga olib chiqadigan shartnomalar imzolanganini ma’lum qildi.

Prezidentning aytishicha, Qatar Amerikadan umumiy qiymati 42 milliard dollarga teng bo‘lgan eng zamonaviy qurol-yarog‘ va harbiy texnikalarni xarid qiladi. Bu texnikalar ro‘yxatiga THAAD zamonaviy raketaga qarshi mudofaa tizimlari, Pegasus yonilg‘i quyish samolyotlari, Desert Vipers rusumli yengil zirhli harbiy mashinalar, amfibiya jangovar transport vositalari, shuningdek, MQ-9B va Sky Guardian turidagi yuqori texnologiyali uchuvchisiz uchuvchi apparatlar kiradi.

Donald Tramp ushbu shartnoma AQSH harbiy sanoati uchun ulkan yutuq ekanligini ta’kidlab, Qatar bilan hamkorlik yaqin kelajakda yanada mustahkamlanishini qayd etdi.

Shu bilan birga, ikki davlat harbiy infratuzilmani yanada kengaytirish va zamonaviylashtirish bo‘yicha ham kelishuvga erishdi. Xususan, Tramp AQSHning Qatardagi Al-Udeyd harbiy bazasini yanada kengaytirish uchun yaqin yillarda 10 milliard dollar mablag‘ ajratilishini ma’lum qildi.

«Qatar ham bu loyihani qo‘llab-quvvatlab, keyingi bir necha yil ichida bazani modernizatsiya qilish va kengaytirishga yana 10 milliard dollar sarmoya ajratishga tayyorligini bildirdi. Bu esa mintaqaviy xavfsizlikni yanada kuchaytirishga katta hissa qo‘shadi», – dedi AQSH prezidenti o‘z nutqida.

Bu Donald Trampning Qatarga amalga oshirgan ilk rasmiy tashrifi hisoblanadi. Shu bilan birga, oxirgi yigirma yil davomida Qatar amirligiga kelgan ilk AQSH prezidenti sifatida tarixga kirdi. Uning Qatar amiri shayx Tamim bin Hamad Ol Soniy bilan muzokaralari iqtisodiy hamkorlikni ham yangi bosqichga olib chiqdi.

Xususan, Qatar milliy aviakompaniyasi Amerikaning yirik samolyot ishlab chiqaruvchisi – Boeing kompaniyasidan yangi samolyotlar xarid qilish bo‘yicha muhim shartnoma imzoladi.

Shuningdek, safar davomida AQSH va Qatar rahbarlari umumiy qiymati 1,2 trillion dollarlik iqtisodiy hamkorlik bitimini imzolashgani avvalroq ma’lum qilingan edi. Bu tarixiy bitim ikki mamlakatning iqtisodiy va strategik sheriklik aloqalarini yanada mustahkamlashi kutilayapti.

Vashington va Doha shuningdek mudofaa va xavfsizlik sohalarida ham bir nechta kelishuvlarga erishdilar. Ushbu kelishuvlar doirasida ikki davlat o‘rtasidagi hamkorlikning doimiy va barqaror ravishda kuchaytirilishi belgilandi.

Zamin.uz tahririyati AQSH va Qatar o‘rtasidagi munosabatlardagi bu muhim o‘zgarishlarni diqqat bilan kuzatib, yangiliklarni o‘z vaqtida siz muxlislarga yetkazib boradi. Siz bu shartnomalar mintaqaviy xavfsizlik va iqtisodiy munosabatlarga qanday ta’sir ko‘rsatadi deb o‘ylaysiz? “Zamin”ni Telegramʻda oʻqing!