Isroil G‘azoda “Gideon” operatsiyasini boshladi: maqsad – HAMASni yo‘q qilish

Isroil mudofaa kuchlari (IDF) G‘azo sektorida yangi masshtabdagi harbiy harakatlarni amalga oshirishni boshladi. Operatsiya “Gideon jangovar aravalari” deb nomlandi va Isroil hukumati buni G‘azodagi “strategik hududlarni nazoratga olish” maqsadida amalga oshirilayotganini ma’lum qildi. Bu haqda RBK-Ukraina IDF va The Times of Israel ma’lumotlariga tayanib yozdi.

Isroil Mudofaa vazirligi xabariga ko‘ra, so‘nggi 24 soat ichida Isroil armiyasi G‘azoda keng ko‘lamli hujumlar uyushtirdi va muayyan hududlar ustidan nazoratni qo‘lga kiritish uchun qo‘shinlar safarbar qilindi. Armiyaning ta’kidlashicha, bu faol harakatlar operatsiyaning ilk bosqichi bo‘lib, asosiy maqsad — HAMAS guruhini yo‘q qilish va garovdagi fuqarolarni ozod etish.

Ommaviy axborot vositalariga ko‘ra, operatsiya quyidagi yo‘nalishlarni qamrab olmoqda:

- Isroil armiyasi G‘azo ustidan to‘liq nazoratni o‘rnatishi;
- Falastinlik tinch aholini janubiy hududlarga evakuatsiya qilish;
- HAMAS jangarilariga nishonli zarbalar berish;
- Guruhning gumanitar yordamni nazorat qilish imkonini cheklash.

Bosh vazir Binyamin Netanyahu 5 may kuni operatsiyaning yangi bosqichi boshlanishi haqida bayonot bergan edi. Unga ko‘ra, Isroilning asosiy maqsadi — HAMASni butunlay yo‘q qilish — o‘zgarishsiz qolmoqda.

13 may kuni esa Netanyahu G‘azoda olib borilayotgan harbiy harakatlar tez orada yakuniga yetayotganini e’lon qildi va “HAMAS bu hududda endi qolmaydi”, deya ta’kidladi.

Zamin.uz tahririyati mintaqadagi vaziyat rivojini diqqat bilan kuzatib boradi. Siz ushbu operatsiya haqida qanday fikrdasiz? “Zamin”ni Telegramʻda oʻqing!