Isroil G‘azoda “Gideon aravalari” operatsiyasini boshladi

Isroil Mudofaa kuchlari 17 may kuni “Gideon aravalari” deb nomlangan yangi keng ko‘lamli harbiy operatsiya boshlanganini ma’lum qildi. Mazkur operatsiya G‘azo sektorida qurolli to‘qnashuvlar davom etayotgan bir paytda boshlandi va Isroil tomoni buni "quruqlikdagi harakatlar fazasi" deb ta’riflamoqda.

HAMASni yo‘q qilish va aholini ajratish — asosiy maqsad

Isroil armiyasi bildirishicha, operatsiyaning asosiy maqsadi HAMAS jangarilarini tinch aholidan ajratish va armiyaga erkin harakatlanish imkonini yaratishdir. Buning uchun G‘azo sektori, ayniqsa uning shimolidagi aholi “janubga ko‘chirilishi” rejalashtirilgan.

Operatsiyada faqat amaldagi harbiylar emas, balki zaxiradagi harbiylar ham ishtirok etmoqda. May oyi boshida The Times of Israel va Bloomberg nashrlari Isroil "o‘n minglab" zaxirachilarni jalb qilishga tayyorlanayotganini ma’lum qilgandi.

670 dan ortiq zarba va yangi bosqich

Isroil harbiy-havo kuchlari o‘tgan hafta mobaynida HAMASga qarashli 670 dan ortiq obyektga zarba berganini ma’lum qildi. Ularning ichida qurol-yarog‘ omborlari, tankka qarshi raketalar moslamalari, yer osti infratuzilma tarmoqlari va harakatning a’zolari bo‘lgan.

Bu zarbalar “Gideon aravalari” operatsiyasi doirasidagi quruqlik harakatlariga tayyorgarlik sifatida amalga oshirilgan. Isroilning ta’kidlashicha, bu aniq yo‘naltirilgan zarbalar bo‘lib, HAMASni zaiflashtirish maqsadida uyushtirilgan.

Netanyaxu: “To‘liq kuch bilan yakunga yetkazamiz”

13 may kuni Isroil bosh vaziri Binyamin Netanyaxu armiya yaqin kunlarda G‘azoda harbiy harakatlarni to‘liq kuch bilan yakunlashga kirishishini ma’lum qildi. Uning so‘zlariga ko‘ra, bu harakatlar HAMASni mag‘lub etishni nazarda tutadi.

Zamin.uz tahririyatidan:
“Gideon aravalari” operatsiyasi G‘azo sektoridagi harbiy to‘qnashuvning yangi, yanada shiddatli bosqichini boshlab berdi. Bu jarayonda tinch aholining taqdiri va mintaqadagi umumiy barqarorlik esa eng katta xavotir manbaidir. Siz bu operatsiya kelajakda tinchlikka xizmat qiladi deb o‘ylaysizmi? “Zamin”ni Telegramʻda oʻqing!