AQSH siyosiy yetakchilari Jo Baydenni qo‘llab-quvvatlamoqda: Tramp ham chetda qolmadi!

Amerika Qo‘shma Shtatlarining sobiq prezidenti Jo Baydenga yaqinda agressiv shakldagi prostata saratoni tashxisi qo‘yilgani haqidagi xabar siyosiy doiralarda katta aks-sado berdi. Shu munosabat bilan mamlakatning hozirgi va sobiq yetakchilari Baydenni ruhan qo‘llab-quvvatlab, samimiy tilaklarini bildirishmoqda.

18 may, yakshanba oqshomida AQSH prezidenti Donald Tramp ham o‘zining Truth Social ijtimoiy tarmog‘ida bayram va siyosiy qarama-qarshiliklarni bir chetga surib, Baydenga samimiy va do‘stona munosabatini namoyon qildi. «Melaniya va men Jo Baydenga qo‘yilgan tibbiy tashxisdan juda tashvishdamiz. Biz Jill Bayden va uning butun oilasiga chuqur va samimiy istaklarimizni yo‘llaymiz, Joga esa tez va muvaffaqiyatli sog‘ayib ketishini tilab qolamiz», — deb yozdi Tramp.

Shu bilan birga, AQSHning 44-prezidenti Barak Obama ham Bayden bilan birdamligini bildirdi. U o‘zining X ijtimoiy tarmog‘ida Baydenning kasallikka qarshi kurashida qat’iyat va matonat namoyish etishiga shubha qilmasligini ta’kidladi. «Mishel va men Bayden oilasi bilan birdammiz. Saratonning barcha ko‘rinishlarida ilg‘or davolash usullarini topish uchun hech kim Jodan ko‘proq harakat qilgani yo‘q. U bu qiyinchilikni yengish uchun barcha kuchini ishga soladi. Biz unga tez va to‘liq shifo topishini tilaymiz», — dedi Obama.

Hozirda AQSHning sobiq vitse-prezidenti bo‘lgan va 2024 yilda prezidentlik saylovlarida Demokratik partiya nomidan qatnashadigan Kamala Xarris ham o‘zining X sahifasida Baydenni qo‘llab-quvvatladi. U: «Jo — haqiqiy kurashchi. U hayoti davomida ko‘p marta sinovlarga qarshi turib, hamisha chidamlilik, kuch va optimizmni namoyon qilgan. Bu gal ham u ana shunday ruhiyat bilan bu qiyinchilikni yengadi deb ishonaman. Biz unga to‘liq va tez sog‘ayib ketishini tilaymiz», — deb ta’kidladi.

Jo Baydenning sog‘lig‘i yuzasidan bildirilgan keng ko‘lamli qo‘llab-quvvatlashlar, siyosiy raqiblar orasida ham insonparvarlik va birdamlikning muhimligini ko‘rsatmoqda. Zamin.uz tahririyati ham Jo Baydenga to‘liq va tez sog‘ayib ketishini tilaydi. “Zamin”ni Telegramʻda oʻqing!