Putin bilan uchrashuvda kursklik amaldor Sumi oblastini bosib olishni so‘radi

Rossiyaning Kursk viloyati Glushkovo tumani rahbari Pavel Zolotarevning Ukrainaga oid shov-shuvli bayonoti siyosiy doirada jiddiy muhokamalarga sabab bo‘ldi. 21 may kuni Rossiya prezidenti Vladimir Putin bilan bo‘lib o‘tgan uchrashuvda Zolotarev Rossiyaga qo‘shni bo‘lgan Sumi viloyatini to‘g‘ridan to‘g‘ri "bizniki bo‘lishi kerak", deb bayonot berdi.

“Yarimorol tarzida yashash ilojsiz. Biz ko‘p bo‘lishimiz shart. Hech bo‘lmasa Sumini qaytarishimiz kerak deb hisoblayman”, — dedi u Kreml rahbariyati bilan muloqotda.

Prezident Putin esa bu so‘zlarga shunday javob berdi: “Shuning uchun ular Aleksandr Yevseyevichni saylashdi. U ham ko‘proq narsani xohlaydi”, — deb ishora qildi Kursk viloyati rahbarining siyosiy intilishlariga.

Bu gaplar ortidan Sumi shahri yana xalqaro e’tibor markaziga chiqdi. Ukraina chegarasidan 30 kilometr uzoqlikda joylashgan bu hududda muntazam ravishda artilleriya va raketa hujumlari sodir bo‘lib kelmoqda. Shu bilan birga, DeepState tahlil markazining ma’lumotiga ko‘ra, Rossiya armiyasi hozirda Sumi viloyatida doimiy nazoratda turgan hududga ega emas.

So‘nggi xabarlarga ko‘ra, 20 may kuni Ukraina Milliy gvardiyasi Rossiya Sumi viloyatidagi poligonga bergan zarba oqibatida olti nafar ukrainalik harbiy halok bo‘lganini ma’lum qildi. Putin esa bu zarbaga nisbatan javob berar ekan, Ukraina armiyasi chegara tomon faol harakatlanayotganini ta’kidladi.

Bu voqealar fonida Ukrainada xavotir tobora ortib borayotgani sir emas. Chunki 13 aprel kuni ham Sumi markaziga raketa yoborilib, 35 inson, jumladan ikki bola halok bo‘lgandi. Shu hujumda 120 nafardan ortiq kishi jarohat olgan.

Rossiya mudofaa vazirligi o‘shandagi zarba “Seversk” harbiy guruhining yig‘ilishi o‘tadigan joyga qaratilganini ma’lum qilgandi.

Zamin.uz tahririyatidan: Rossiya rasmiylarining so‘nggi bayonotlari hamda Rossiya-Ukraina chegarasidagi harakatlar mintaqada keskinlikni yanada kuchaytirmoqda. Siz bu chaqiriqlar nimadan darak beradi deb o‘ylaysiz? Bu diplomatik bosimmi yoki ehtimoliy yangi bosqichning ishorasimu? “Zamin”ni Telegramʻda oʻqing!