27 yoshida milliardga erishgan MrBeast tarix yaratdi

Internet olamida MrBeast nomi bilan mashhur bo‘lgan Jimmi Donaldson o‘z salohiyati, mehnati va innovatsion g‘oyalari bilan milliard dollar boylikka ega bo‘lib, dunyodagi eng yosh “self-meyd” milliarder sifatida tarixga kirdi. U hammasiga o‘zi, hech qanday meros yoki katta sarmoyalarsiz erishgan. Jimmining boyligi hozirda 1 milliard dollarga baholanmoqda, oylik daromadi esa taxminan 50 million dollarga yetgan.

YouTube'dan boshlangan imkonlar olami

Jimmi Donaldson o‘z faoliyatini oddiy, kichkina kamera va katta orzular bilan YouTube platformasida boshlagan. U 2017 yilda 100 000 gacha sanagan videosi bilan keng jamoatchilik e’tiborini qozongan. Bu videorolik 44 soat davomida suratga olingan bo‘lib, 31 million marta ko‘rilgan. Ushbu video MrBeast'ning muvaffaqiyat sari yo‘lini ochdi va uni internetning eng mashhur shaxslaridan biriga aylantirdi.

Vaqt o‘tishi bilan Jimmi kontentini faqat ko‘ngilochar emas, balki xayr-saxovatga asoslangan yo‘nalishda ham rivojlantirdi. U odamlarga katta miqdorda pul, uy, mashinalar sovg‘a qilish orqali nafaqat ko‘rishlar sonini oshirdi, balki tomoshabinlar qalbini ham zabt etdi.

Yutubdan tashqari imperiya qurgan yigit

MrBeast bugun faqat videobloger emas, balki turli sohalarda faoliyat olib borayotgan tadbirkor. U o‘zining Feastables shokolad brendini yaratdi va unga katta sarmoya kiritdi. Shuningdek, Beast Games realiti-shousi va shaxsiy merch (suvenir mahsulotlar) liniyasi orqali ham daromad topmoqda.

2024 yilda u Amazon bilan hamkorlikda striming kontenti yaratishni rejalashtirganini ma’lum qildi. Forbes jurnali 2024 yilda uning daromadini 85 million dollar deb baholadi. Ammo MrBeast Burgers loyihasi bo‘yicha chiqarilgan sud hujjatlariga ko‘ra, u 2023 yilda 223 million dollar ishlab topgan, 2024 yilga kelib esa bu ko‘rsatkich 700 million dollarga yetgan.

Noldan milliardgacha — yurakdan chiqqan safar

Jimmi Donaldson — Shimoliy Karolinada tug‘ilib o‘sgan oddiy bola. O‘smirlik chog‘ida u kompyuter o‘yinlari haqidagi videolarni suratga olib, YouTube'ga joylashni boshlagan. U katta auditoriya jalb qilish, kontent orqali dunyoga ta’sir ko‘rsatish va eng muhimi, odamlarga yaxshilik qilishni maqsad qilgan.

Xayriya ishlari MrBeast'ning faoliyatida alohida o‘rin tutadi. U minglab odamlarga oziq-ovqat, turar joy va tibbiy yordam taklif qilgan. Bunday xayrli ishlar uni nafaqat mashhur, balki ta’sirli shaxsga aylantirdi.

Internetda milliard dollar ishlab topish orzudek tuyuladi. Ammo Jimmi Donaldson bu orzuni reallikka aylantira oldi. U mehnat, qat’iyat va odamlarga yaxshilik qilish orqali muvaffaqiyatga erishdi. 27 yoshida erishilgan milliard — bu faqat pul emas, balki ilhom, yutuq va butun boshli bir avlod uchun namuna. MrBeast'ning tarixi bizga shunchaki “yutuber” emas, balki haqiqiy ilhom manbai borligini isbotlaydi.