Alp tog‘lari bag‘rida yashash uchun pul beradigan qishloq!

Shveysariyaning Alp tog‘lari etaklarida joylashgan kichik va juda go‘zal Albinen qishlog‘i o‘z aholisini ko‘paytirish uchun ajoyib dastur e’lon qildi. Ushbu qishloqqa ko‘chib keluvchilarga katta miqdorda moliyaviy yordam taklif etilmoqda, deb xabar tarqatdi Daily Mail nashri.

Ma’lum qilinishicha, bu yerga ko‘chib kelgan har bir yangi aholiga 20 ming Shveysariya franki (taxminan 24 ming AQSH dollari) taqdim etiladi. Bundan tashqari, oilalarga har bir farzandi uchun qo‘shimcha 10 ming frank miqdorida bonus ham berilmoqda. Shu tariqa, ikki farzandli oila bu joyga ko‘chib o‘tganda umumiy 40 ming frankni o‘zlashtirishi mumkin.

Albinen aholisining bu tashabbusi qishloqdagi odamlar sonining tez sur’atlarda kamayib borayotganiga qarshi kurashish maqsadida amalga oshirilmoqda. Shu sababli mahalliy hokimiyat shu yo‘l bilan yangi aholini jalb qilish va hududni yanada jonlantirishni rejalashtirmoqda.

Ammo Albinenda yashash imkoniyatiga ega bo‘lish uchun bir necha jiddiy shartlar qo‘yilgan. Birinchi navbatda, bu yerga ko‘chib keluvchi inson yoki oila qishloqdan eng kamida 200 ming Shveysariya frankiga teng qiymatda uy sotib olishi shart. Shu bilan birga, uyning doimiy yashash uchun mo‘ljallangan bo‘lishi talab etiladi, ya’ni bu ko‘chib keluvchilar faqat yozgi ta’til uchun emas, balki yil bo‘yi ushbu manzilda istiqomat qilishi lozim.

Dasturdan foydalanmoqchi bo‘lganlarning yoshi ham cheklangan. Ular 45 yoshdan katta bo‘lmasliklari shart. Qo‘yilgan bu talabning asosiy sababi esa yosh oilalar va ishchi kuchi bo‘lgan aholini jalb qilishdir.

Eng asosiy shartlardan yana biri shundaki, ko‘chib keluvchilar Albinen qishlog‘ida kamida 10 yil davomida doimiy yashash majburiyatini o‘z zimmalariga oladi. Shu muddat davomida ular Shveysariya jamiyati bilan to‘liq integratsiyalashib, keyinchalik mamlakat fuqaroligini ham olishlari kerak bo‘ladi.

Albinen o‘zining betakror tabiati, sof havosi va jimjit muhiti bilan juda ko‘p sayyohlarni o‘ziga jalb qiladi. Biroq so‘nggi yillarda aholi sonining qisqarishi oqibatida qishloqda turmush tarzi biroz pasaygan. Shu sababli mahalliy hokimiyat mazkur muammoni hal qilish uchun yuqoridagi moliyaviy imtiyozlardan foydalanishni lozim ko‘rgan.

Mahalliy aholi vakillari bu tashabbus orqali qishloqda yangi hayot boshlanishiga, ko‘chib kelgan yosh oilalar esa Alp tog‘lari bag‘ridagi tinch va farovon hayotdan bahramand bo‘lishlari mumkinligiga ishonch bildirmoqda.

Albinen qishlog‘ining mazkur taklifi dunyoning turli burchaklaridan ko‘plab odamlarning diqqatini tortmoqda. Ko‘rinib turibdiki, yoqimli Alp tabiati qo‘ynida yashash istagida bo‘lganlar uchun bu noyob imkoniyat hisoblanadi. Agar siz ham tabiat bag‘rida tinch va sog‘lom hayot kechirishni orzu qilsangiz, Albinen qishlog‘i sizni kutib qoladi! “Zamin”ni Telegramʻda oʻqing!