AQSH Ukrainaga harbiy yordam budjeti qisqarmoqda — rasmiy bayonot

Qo‘shma Shtatlar Ukrainaga qurol-yarog‘ yetkazib berish uchun ajratiladigan mablag‘lar hajmini kamaytirishga qaror qildi. Bu haqda AQSH Mudofaa vaziri Pit Hegset Kongressning Vakillar palatasidagi so‘nggi yig‘ilishida ma’lum qildi. Uning ta’kidlashicha, Vashingtonda Ukrainaga nisbatan yangi siyosiy yondashuv va strategik qarorlar qabul qilinmoqda.

Mudofaa vaziri hozirgi AQSH prezidenti ma’muriyati Rossiya-Ukraina urushi bo‘yicha “tamoman boshqacha” yondashuvga ega ekanini alohida qayd etdi. “Biz tinchlikka erishish uchun ikki tomon manfaatlarini inobatga olgan holda siyosat yuritishni maqsad qilganmiz. Bu nafaqat Ukraina va Rossiya uchun, balki AQSHning o‘z manfaatlari uchun ham to‘g‘ri yechim”, — dedi Hegset.

AQSH so‘nggi yillarda Ukrainaga eng ko‘p harbiy yordam ko‘rsatgan davlat bo‘lib keldi. Ayniqsa, Jo Bayden ma’muriyati davrida Kiyevga qurol-yarog‘ va moliyaviy yordam keng ko‘lamda amalga oshirilgan edi. Biroq, Donald Tramp prezidentlikka kelgach, rasmiy Vashington tomonidan Ukrainaga harbiy ta’minotni davom ettirish bo‘yicha qarorlar qayta ko‘rib chiqilmoqda.

The Wall Street Journal nashriga ko‘ra, AQSH hukumati Ukraina uchun mo‘ljallangan raketa komponentlarining katta qismini Yaqin Sharqdagi Amerika qo‘shinlariga yo‘naltirishga qaror qilgan. Ukraina prezidenti Vladimir Zelenskiy ham ushbu ma’lumotni tasdiqlab, Kiyevda AQSHdan yangi harbiy yordam kelishi bo‘yicha noaniqlik saqlanayotganini bildirgan.

Bu yangilik xalqaro hamjamiyat, ayniqsa, Yevropa va Ukrainada jiddiy xavotir uyg‘otmoqda. Amerika ma’muriyatida Ukrainaga yordamni qisqartirish “dunyodagi barcha qarama-qarshiliklarni hisobga olgan holda, tinchlik yo‘lini topish” zarurati bilan izohlanmoqda.

Ekspertlar fikricha, yangi siyosiy yondashuvlar va budjet cheklovlari sharoitida Ukraina frontida vaziyat murakkablashishi mumkin. AQSHning yordam qisqarishi Kiyev uchun jiddiy qiyinchiliklar tug‘dirishi, shu bilan birga Rossiya va Ukraina o‘rtasida muzokaralarga yangi bosqichni boshlashi mumkin. “Zamin”ni Telegramʻda oʻqing!