BRICS davlatlari sun’iy intellekt bo‘yicha talab qo'ymoqda

BRICS davlatlari — Braziliya, Rossiya, Hindiston, Xitoy va Janubiy Afrika — sun’iy intellekt (SI) texnologiyalarining jadal rivojlanishini hisobga olib, ushbu yo‘nalishda axborot xavfsizligi va intellektual mulk huquqlarini himoya qilish zarurligini ta’kidladi. Rio-de-Janeyroda bo‘lib o‘tayotgan ikki kunlik sammit doirasida yetakchilar tomonidan ko‘rib chiqilayotgan bayonot loyihasida, SI tizimlari orqali ruxsatsiz ma’lumot yig‘ishning oldini olish va mualliflik huquqlari uchun adolatli to‘lov mexanizmlarini joriy etish chaqirig‘i ilgari surilgan.

Sammitda qatnashayotgan yetakchilar, asosan rivojlangan davlatlarda joylashgan yirik texnologik kompaniyalar tomonidan SI model mashg‘ulotlarida mualliflik huquqlari bilan himoyalangan kontentdan foydalanishga qarshi qat’iy pozitsiyani bildirgan. Ular adolatli raqamli iqtisodiyotni shakllantirishda rivojlanayotgan mamlakatlarning manfaatlari inobatga olinishi lozimligini ta’kidlashmoqda.

Bayonot loyihasida qayd etilishicha, BRICS davlatlari SI texnologiyalaridan foydalanishda "inson huquqlarini hurmat qilish, shaffoflik va mas’uliyatlilik" tamoyillariga amal qilinishini qo‘llab-quvvatlaydi. Shuningdek, ular xalqaro hamjamiyatni global SI boshqaruvi va normativ bazasini shakllantirishda faol ishtirok etishga chaqirmoqda.

Braziliya harbiy kuchlari tomonidan sammit xavfsizligini ta’minlash maqsadida o‘tkazilgan mashg‘ulotlar fonida, mazkur forum xalqaro siyosiy va texnologik kun tartibining dolzarb masalalaridan birini muhokama qilmoqda.

BRICS davlatlari tomonidan ko‘tarilgan bu tashabbus sun’iy intellekt vositalaridan foydalanganda axborotga egalik huquqi, shaxsiy hayotni himoya qilish va adolatli kompensatsiya kabi fundamental masalalarga xalqaro e’tiborni kuchaytirishga qaratilgan muhim qadam bo‘lishi mumkin. “Zamin”ni Telegramʻda oʻqing!