Trampning Ukrainaga birinchi yordami: AQSH 9 million dollarlik harbiy shartnoma imzoladi

Amerika–Ukraina harbiy hamkorligida yangi sahifa: BAE Systems Land & Armaments LP kompaniyasi Bradley jangovar mashinalarini texnik ko‘rikdan o‘tkazish va to‘liq jangovar holatga keltirish bo‘yicha 9 million dollarlik shartnoma qo‘lga kiritdi, deb yozadi defense.gov. Bu mablag‘lar 2025-moliya yili uchun Ukraina xavfsizlik tashabbusi (USAI – Ukraine Security Assistance Initiative) doirasida yo‘naltiriladi.

Shartnoma hajmi katta bo‘lmasada, u Donald Trampning ikkinchi prezidentlik muddatida Ukrainaga berilgan ilk rasmiy harbiy yordam sifatida qayd etilmoqda. USAI dasturi 2022 va 2023 yillarda AQSH budjeti hisobidan Ukraina mudofaa qobiliyatini oshirish uchun jami 18 milliard dollar ajratdi. 2024 yilda esa yangi harbiy paket uchun 13,77 milliard dollar mablag‘ yo‘naltirilishi ko‘zda tutilgan.

Yangi shartnoma va yordam paketi Vashington va Kiyev o‘rtasidagi strategik sheriklikning davom etishini va AQSHning Ukrainaga sodiqligini yana bir bor tasdiqlamoqda. CBS News insayderlariga ko‘ra, Tramp ma’muriyati so‘nggi kunlarda Ukrainaga qo‘shimcha milliardlab dollarlik harbiy yordam ajratish imkoniyatini ham ko‘rib chiqayotgani aytilmoqda. Bu yordam Rossiyaning so‘nggi dron va raketa hujumlariga javob sifatida ham baholanmoqda.

Reuters agentligining ma’lumotlariga ko‘ra, Tramp birinchi marta AQSH Kongressining roziligisiz, Prezident farmoni asosida (PDA – Presidential Drawdown Authority) Ukrainaga qurol-yarog‘ yuborishga qaror qilgan. Navbatdagi yordam paketi qariyb 300 million dollarni tashkil etib, unda Patriot majmualari uchun raketalar, HIMARS tizimlari uchun GMLRS snaryadlari va o‘rta masofali raketalar ham bor.

So‘nggi ma’lumotlarga ko‘ra, Tramp Putindan noqulaylik sezganini va NATO bilan birgalikda Kiyevga qurol yetkazib berish bo‘yicha kelishuvga erishganini ta’kidlagan.

Yakuniy xulosa: Amerikadagi siyosiy o‘zgarishlar va tashqi siyosatdagi yangi yo‘nalishlar Ukrainaga harbiy yordam ko‘rsatishda yangi bosqichni boshladi. 9 million dollarlik shartnoma ham ikki davlat munosabatlarida yangi tendensiya va kelajakda yirik yordam paketlariga yo‘l ochishi kutilmoqda. AQSH va Ukraina o‘rtasidagi strategik sheriklik nafaqat mudofaa sohasida, balki xalqaro barqarorlik uchun ham muhim ahamiyatga ega bo‘lib bormoqda. “Zamin”ni Telegramʻda oʻqing!