Fransiyada to‘y an’analariga yangicha yondashuv taklif etildi. "Invitin" nomli startap orqali endi xohlovchilar tanish bo‘lmagan juftliklarning to‘yida mehmon sifatida ishtirok etishlari mumkin. Bu xizmat uchun o‘rtacha 150 yevro to‘lash talab qilinadi.
Startap asoschisi Katya Lekarskining so‘zlariga ko‘ra, har bir to‘yda 5-10 nafargina begona mehmon bo‘lishiga ruxsat beriladi. Bu esa nafaqat to‘y egalariga xarajatlarni qisman qoplash imkonini beradi, balki mehmonlar uchun ham noodatiy madaniy tajriba sanaladi.
Parijdagi to‘y ko‘rgazmasida bu g‘oya bilan tanishgan juftlik — Jannifer va Paulo — o‘z to‘ylariga 5 nafar begona mehmonni taklif qilishga qaror qilgan. Ular:
- Mehmonlarni maxsus ilovadagi profillar orqali tanlashgan;
- Har bir mehmon 150 yevro to‘lab, to‘yda butun kun ishtirok etadi;
- Mehmonlar tarkibida bir juftlik va uch nafar erkak bor;
- Asosiy maqsad — nafaqat xarajatlarni kamaytirish, balki kutilmagan tanishuv va quvonchli muhit yaratish.
Janniferning ta’kidlashicha: «Bu pul masalasi emas, balki atmosferani boyitish haqida. Biz ekstravertmiz va bunday yangicha formatni xush ko‘ramiz».
Shuningdek, kelin va kuyov to‘ydagi ayollar va erkaklar sonidagi nomutanosiblikni ham begona mehmonlar hisobiga bartaraf etmoqchi. Bu yangilik Fransiyada keng qiziqish uyg‘otdi va ehtimol, boshqa mamlakatlarda ham paydo bo‘lishi mumkin.
Manba: Pravilamag
“Zamin”ni Telegramʻda oʻqing!
