Eron hukumati 5 avgust, seshanba kuni mamlakat davlat televideniyesi orqali muhim bayonot bilan chiqdi. Rasmiylarga ko‘ra, Tehron shahri va yana 31 ta viloyatdan 15 tasidagi davlat tashkilotlari hamda banklar chorshanba kuni faoliyatini to‘xtatadi. Bu choralar keskin issiq ob-havo ta’sirida vujudga kelgan suv tanqisligi va elektr tarmog‘idagi og‘ir yuklamalar tufayli qabul qilindi, deb ma’lum qildi rasmiy axborot manbalari.
Biroq, bu cheklovlar barcha sohalarga taalluqli emas. Tibbiyot muassasalari, xususiy sektorga tegishli kompaniyalar va ayrim banklar filiallari o‘z ishini odatdagidek davom ettiradi. Bunday farqli yondashuv mamlakat iqtisodiy va ijtimoiy barqarorligini saqlab qolishga qaratilgan.
Iyul oyi o‘rtalarida boshlangan va hozirgi kungacha to‘xtamagan anomal issiqlik hali kamida besh kun davom etishi kutilmoqda. Eng yuqori haroratlar Eronning janubida kuzatilmoqda. Masalan, 3 avgust kuni Obodon shahrida havo harorati +50°C belgicidan ham oshib ketdi. Bu kabi issiqliklar Eronda ilgari ham keskin choralar ko‘rilishiga sabab bo‘lgan — 2023 va 2024 yil avgust oylarida, shuningdek, 2025 yil iyul oyining oxirida ham shu kabi dam olish kunlari e’lon qilingan edi.
Hukumatning umidi shundaki, davlat muassasalarida vaqtincha tanaffus e’lon qilinishi orqali suv va elektr energiyasi iste’moli keskin kamayadi. Ayni paytda mamlakatda soatiga 62 ming megavatt elektr energiyasi ishlab chiqarilayotgan bo‘lsa-da, talab yuqori yuklama paytlarida 80 ming megavattga yetib bormoqda. Mavjud quvvat yetarli emasligi natijasida Tehron va boshqa yirik shaharlarda har kuni o‘rtacha 2–4 soatgacha elektr ta’minoti vaqtincha to‘xtatilmoqda.
Bu holat nafaqat aholida, balki ishlab chiqarish sohalarida ham katta qiyinchiliklarga sabab bo‘lmoqda. Mahalliy "Shargh" gazetasining xabar berishicha, ko‘plab sanoat korxonalari haftasiga to‘rt kun davomida elektrsiz qolmoqda. Bu esa mamlakat ishlab chiqarish darajasini koronavirus pandemiyasi paytidagi, ya’ni 2020 yildagi darajaga tushirib qo‘ydi.
Ommaviy axborot vositalari Eron so‘nggi o‘n yilliklar davomida kuzatilmagan darajadagi og‘ir qurg‘oqchilikni boshdan kechirayotganini ta’kidlashmoqda. Tabiiy resurslarga bo‘lgan bosim tobora ortib borayotgan bir paytda, Eron rahbariyati bunday g‘ayrioddiy ob-havo sharoitiga javoban tezkor va qat’iy choralar ko‘rishga majbur bo‘lmoqda.
Bu voqealar mamlakat aholisini hayot tarzi va faoliyatini qayta ko‘rib chiqishga, tabiiy resurslardan oqilona foydalanishga undamoqda. Bunday iqlim sinovlari global miqyosda ham dolzarb ahamiyat kasb etmoqda.
