Isroil G‘azoga hujum qildi, ocharchilik xavfi kuchaymoqda

G‘azo shahri uch kundan beri tinimsiz havo hujumlariga uchramoqda. HAMAS nazoratidagi fuqaro mudofaasi ma’lumotiga ko‘ra, Zeitun va Sabra tumanlarida portlashlar ko‘plab uylarni vayron qilgan, o‘lik va yaradorlarni olib chiqish esa davom etayotgan vayronagarchilik sababli imkonsiz bo‘lib qolgan.

Buyuk Britaniya, Yevropa Ittifoqi, Avstraliya, Kanada va Yaponiya “G‘azada ocharchilik yuz bermoqda” deya bayonot berib, yordamni tezkor yetkazish uchun “aniq va doimiy choralar” ko‘rishga chaqirdi. Isroil ocharchilik mavjudligini inkor etib, BMT agentliklarini yordamni chegaradan olib kirishda sustkashlikda aybladi.

Jahon sog‘liqni saqlash tashkiloti Isroildan G‘azodagi tibbiyot muassasalarini dori-darmonlar bilan ta’minlashga ruxsat berishni so‘ramoqda. Sog‘liqni saqlash vazirligi ma’lumotiga ko‘ra, so‘nggi 24 soat ichida 100 kishi, jumladan yordam punktlarida 31 fuqaro halok bo‘lgan, besh nafar esa ocharchilikdan vafot etgan.

Isroil urush kengashi G‘azo shahrini egallash rejasini tasdiqlagan. Bosh vazir Netanyaxu HAMASning “ikki qolgan tayanch nuqtasini” yo‘q qilish va yordam yetkazish yo‘laklarini ochishni va’da qilgan.

8-avgust kuni Isroil armiyasi Al Jazeera telekanali jurnalistlariga zarba berganini tasdiqladi. Xalqaro tashkilotlar Isroildan bu hujumni oqlovchi dalillarni taqdim etishni talab qilmoqda. Isroil esa faqat “terrorchi guruh a’zolariga” zarba berilayotganini ta’kidlashda davom etmoqda.