Turkiya huquq-tartibot organlari mamlakatdagi eng yirik kiberjinoyat ishlaridan biri bo‘yicha muhim ayblov e’lon qildi. Prokuratura ma’lumotlariga ko‘ra, bir guruh yoshlar hukumatning maxfiy ma’lumotlar bazalariga noqonuniy kirib, davlat arboblariga oid shaxsiy ma’lumotlarni o‘g‘irlagan va sotgan.
Davlat ma’lumotlariga hujum va maqsadli o‘g‘irlik
Ayblov xulosasida 20 nafar shaxs ko‘rsatilgan bo‘lib, ularning 13 nafari 2021 yilda sodir etilgan jinoyat vaqtida hali voyaga yetmagani qayd etilgan. Tergov ma’lumotlariga ko‘ra, hakerlar Ichki ishlar, Sog‘liqni saqlash, Ta’lim vazirliklari hamda qator davlat idoralari, sug‘urta kompaniyalari va shahar hokimliklariga tegishli onlayn platformalarni buzib kirgan.
Jinoyatchilar o‘g‘irlangan ma’lumotlardan elektron hujjatlarni qalbakilash va keyinchalik sotishda foydalangan. Ular tayyorlab sotgan hujjatlar orasida akademik ma’lumotnomalar, politsiya ma’lumotlari, ko‘chmas mulkka oid hujjatlar, dori-darmon retseptlari va boshqalar bo‘lgan.
Prezident va vazirlar ma’lumotlari qo‘lga tushgan
Ayni tergov materiallarida aytilishicha, hakerlar hatto prezident Rajab Toyyib Erdo‘g‘anning haqiqiy 11 xonali identifikatsiya raqami hamda bir nechta vazirga oid shunday shaxsiy ma’lumotlarni qo‘lga kiritgan. Ular mijozlarga internet orqali istalgan turdagi kasallik varaqasi yoki boshqa rasmiy hujjatni tayyorlab berishni taklif qilgan.
Jinoyat tarixi va tergov jarayoni
Ma’lumotlar bazasidagi o‘g‘irlik 2021 yilda aniqlangan. 2022 yil aprelidan boshlab politsiya va prokuratura gumonlanuvchilarni qo‘lga olish amaliyotini boshlagan. Yaqinda esa rasmiy ayblov e’lon qilinib, sudga taqdim etildi. Agar ayblar isbotlansa, ishtirokchilar 15 yilgacha ozodlikdan mahrum etilishi mumkin.
Ilgarigi mojarolar
Turkiyada yuqori martabali davlat arboblari ma’lumotlarini o‘g‘irlash bo‘yicha voqealar avval ham sodir bo‘lgan. 2016 yilda noma’lum shaxslar 50 ming fuqaroning shaxsiy ma’lumotlarini, jumladan prezident haqidagi ma’lumotlarni ochiq e’lon qilgan edi. O‘sha paytda jinoyatchilar o‘z harakatlarini bevosita Erdo‘g‘anga qarshi qaratilganini iddao qilgan.
