Janubiy Koreyada 26 avgustdan e’tiboran chet el fuqarolari uchun ko‘chmas mulk xarid qilishda yangi qoidalar kuchga kiradi. Endi Seul shahri va poytaxtning ko‘pgina tumanlarida uy-joy sotib olish ancha cheklangan holda amal qiladi. Xorijliklar faqat mahalliy hokimiyatning ruxsati bilan va shaxsiy yashash maqsadida ko‘chmas mulk egalik qilishlari mumkin.
Cheklovlar qo‘llaniladigan hududlar qatoriga Seul shahri, Kyongido provinsiyasidagi 23 ta munitsipalitet (Yangju, Ichon, Ijongbu, Tonduchon, Yangpyon, Yoju, Gapyong va Yongchon mustasno) hamda Inchondagi yettita avtonom okrug (Donggu, Kanghwa va Onjindan tashqari) kiradi. Shu bilan birga, barcha xorijiy shaxslar, kompaniyalar va tashkilotlar ko‘chmas mulk sotib olishdan oldin rasmiy ruxsat olishi shart. Ruxsatsiz tuzilgan bitimlar huquqiy jihatdan haqiqiy deb hisoblanmaydi.
Yangi qoidalar barcha turdagi uy-joylarga nisbatan amal qiladi: kvartiralar, ko‘p qavatli uylar, taunxauslar va xususiy uylar. Faqat ofistellar, ya’ni biznes-sinf apartamentlar, bu cheklovdan mustasno. Shuningdek, uy xarid qilgan chet elliklar 4 oy ichida ko‘chib o‘tishi va u yerda kamida 2 yil istiqomat qilishi shart. Shu bois, uyni ijaraga berishga ruxsat berilmaydi. Agar ko‘chmas mulk pulga sotib olinsa, ruxsat olish talab qilinadi, lekin bepul beriladigan uylar uchun bu shart qo‘llanilmaydi.
Qoida buzilganda, mulk joylashgan hudud hokimiyati 3 oy ichida qonuniy chora ko‘rishni buyuradi. Agar bu talab bajarilmasa, har yili yer narxining 10 foizigacha jarima solinishi mumkin. Shu bilan, xorijliklar uchun Koreyada uy sotib olishda yangi tartiblar qat’iy va jiddiy nazorat ostida bo‘ladi.
“Zamin”ni Telegramʻda oʻqing!
