Shvetsiyaning Kiruna shahrida noyob muhandislik amaliyoti o‘tkazildi — butunlay yog‘ochdan qurilgan va 672 tonna og‘irlikdagi tarixiy cherkov 5 kilometr uzoqlikdagi boshqa hududga ko‘chirib o‘rnatildi.
Bu qaror tasodifiy emas. Kiruna shahri yaqinida Yevropadagi eng yirik yerosti temir koni joylashgan bo‘lib, u kengaytirilmoqda. Natijada ayrim binolar, jumladan, muhim madaniy meros obyektlari ham boshqa hududlarga ko‘chirilmoqda. Cherkov ham aynan shunday inshootlardan biri bo‘lib, tarixiy va me’moriy ahamiyatga ega.
Ko‘chirish jarayoni maxsus tayyorlangan platforma va texnika yordamida amalga oshirildi. Muhandislar har bir detalni ehtiyotkorlik bilan kuzatib bordi, chunki yog‘och konstruksiya shikastlanmasligi muhim edi.
Mahalliy aholi bu voqeani katta qiziqish bilan kuzatdi. Ko‘pchilik uchun bu cherkov nafaqat ibodat maskani, balki shaharning ramziga aylangan tarixiy yodgorlikdir.
Endilikda u yangi joyda avvalgi ko‘rinishini saqlagan holda faoliyatini davom ettiradi. Bu loyiha Shvetsiyada madaniy merosni asrash va sanoat taraqqiyoti o‘rtasidagi muvozanatga bo‘lgan e’tiborni namoyon etdi.
