Turkiya xonimi Emine Erdo‘g‘an Trampdan G‘azo bolalari uchun yordam so‘radi

Turkiya birinchi xonimi Emine Erdo‘g‘an AQSh prezidenti Donald Trampning rafiqasi Melaniya Trampga murojaat qildi. U Melaniyadan Isroil bosh vaziri bilan bog‘lanib, G‘azodagi bolalar ahvoli haqida gapirishini so‘radi.

Emine Erdo‘g‘an o‘z xatida Melaniya Trampning yaqinda Rossiya va Ukraina bolalari haqida Vladimir Putinga yo‘llagan maktubidan ilhom olganini aytdi. Uning fikricha, shu kabi e’tibor G‘azo bolalari uchun ham zarur.

Xatda Emine Erdo‘g‘an: “Siz 648 nafar ukrainalik bola haqida ko‘rsatgan e’tiboringiz G‘azoga ham tatbiq etilishiga ishonaman”, deya ta’kidladi. U, shuningdek, Falastin masalasi dunyoda tobora ko‘proq e’tirof etilayotganini qayd etdi.

Shu kunlarda xalqaro tashkilotlar G‘azoda ochlik rasmiy ravishda ocharchilik darajasiga yetganini bildirdi. Mutaxassislar bu vaziyat yanada og‘irlashishi mumkinligini, bu esa Isroilga gumanitar yordamni ko‘proq kiritishga bosimni kuchaytirishini aytmoqda.

Isroil bosh vaziri Benyamin Netanyaxu esa bu xabarlarni rad etib, “Isroil ochlikni keltirib chiqarmaydi, aksincha uni oldini oladi”, deb javob berdi. G‘azodagi urush 2023-yil 7-oktabrda Hamas hujumidan keyin boshlangan bo‘lib, hozirga qadar 62 mingdan ortiq falastinlik halok bo‘lgani aytilmoqda.