Rossiya poytaxti Moskva shahrining shimoliy-sharqiy qismida joylashgan Sviblovo tumanida yuraklarni titratuvchi mudhish voqea ro‘y berdi. Odatda oddiy ko‘rinadigan — qo‘shni uydan baland eshitilgan musiqa sabab bo‘lgan mojaro oqibatida inson hayoti halokat bilan tugadi. Bu haqda "Moskva" axborot agentligi shahar prokuraturasi matbuot xizmatiga tayanib ma’lum qildi.
Rasmiy ma’lumotlarga ko‘ra, Kolskaya ko‘chasidagi ko‘p qavatli uyda 37 yoshli mahalliy fuqaro uyida spirtli ichimlik iste’mol qilayotgan paytda qo‘shni xonadondan kelayotgan baland musiqa ovozidan bezovta bo‘lgan.
Gumonlanuvchi so‘roq paytida aytganidek: "Men musiqani o‘chirishlarini so‘rash uchun bordim. Biroq mojaro chiqishi mumkinligini oldindan his qilib, o‘zim bilan ikki ta oshxona pichog‘ini olib chiqdim. Eshik ostonasiga yetib kelganimda, qo‘limda pichoqlar bor edi".
Hodisa shu tariqa qo‘shni uy ostonasida keskin janjalga aylandi. Natijada erkak eshikni ochgan qo‘shnilariga pichoq bilan tan jarohati yetkazgan. Jabrlanganlar tez tibbiy yordam orqali shifoxonaga yetkazilgan bo‘lsa-da, ulardan biri olingan og‘ir jarohatlar oqibatida hayotdan ko‘z yumgan.
Huquqni muhofaza qilish organlari ma’lumot berishicha, gumonlanuvchi hozirda qo‘lga olingan va u o‘z qilmishini tan olgan holda ko‘rsatma bergan. Prokuratura bu ishni alohida nazoratga olgani, jinoyatchiga qonuniy jazo tayinlanishi kutilmoqda.
