Rossiyaning yirik transport uzellaridan biri hisoblangan Sankt-Peterburgdagi Pulkovo aeroportida kutilmagan holat ro‘y berdi. Xabarlarga ko‘ra, dronlar hujumi natijasida aeroportning ish faoliyati to‘liq falaj bo‘lib, parvozlarni qabul qilish va amalga oshirish bir necha soat davomida to‘xtatildi.
Ma’lumotlarga ko‘ra, umumiy hisobda 100 ga yaqin reys turli qiyinchiliklarga duch keldi. Ulardan ayrimlari jiddiy kechiktirilgan bo‘lsa, boshqa xalqaro yo‘nalishdagi parvozlar umuman bekor qilindi. Bu holat nafaqat yo‘lovchilar, balki butun aviatsiya tizimi uchun jiddiy muammolarni keltirib chiqardi.
Leningrad viloyati gubernatori Aleksandr Drozdenko rasman bayonot berib, dronlar hujumi haqidagi ma’lumotni tasdiqladi. Uning ta’kidlashicha, bir nechta dronlar havo mudofaa tizimlari tomonidan urib tushirilgan. Shu bilan birga, hodisaning oqibatlari faqat aeroport ishi bilan cheklanib qolmagan.
“Strana” nashri yozishicha, Sankt-Peterburg shahri va Leningrad viloyati aholisi internet va mobil aloqadagi uzilishlardan ham norozilik bildirmoqda. Bu esa hujum natijasida infratuzilmaga ham ta’sir ko‘rsatilganini anglatmoqda.
