Ukraina hukumati yana bir muhim gumanitar qadamga qo‘l urdi. Rasmiy ma’lumotlarga ko‘ra, Rossiya va Gurjiston chegarasidagi bufer zonada qiynalib qolgan 65 nafar ukrainalik Vatanga qaytarildi. Bu haqda Ukraina tashqi ishlar vaziri Andrey Sibiga hamda ichki ishlar vaziri Igor Klimenko o‘z sahifalari orqali ma’lumot tarqatishdi.
Ma’lum qilinishicha, qaytarilganlar orasida 10 nafar ayol va 8 nafar og‘ir kasal bo‘lgan inson ham bor. Ular Moldova hududi orqali tranzit yo‘li bilan Ukrainaga yetkazildi. Sibiga va Klimenko ta’kidlashicha, ushbu fuqarolar Gurjistondagi «Daryali» nazorat-o‘tkazish punktida Rossiya harakatlari tufayli yuzaga kelgan og‘ir gumanitar inqiroz sharoitida qolib ketishgan.
Vazirlar aytishicha, Ukraina diplomatlari va konsullik xizmatlari bu jarayonda faol ishtirok etgan. Ular nafaqat fuqarolarni qaytarish, balki chegaradagi sharoitni yaxshilash uchun ham barcha choralarni ko‘rishgan. Shuningdek, xalqaro tashkilotlar yordamini jalb etish orqali ish yanada tezlashtirilgan.
Ukraina TIV ma’lumotlariga ko‘ra, so‘nggi oylarda umumiy hisobda 44 nafar fuqaro qaytarilgan edi. Yangi qaytish bilan bu raqam 109 kishiga yetdi. Bu esa Ukraina hukumati o‘z fuqarolarining taqdiri va ularning xavfsizligi uchun qat’iy ish olib borayotganidan dalolatdir.
Muttaxassislar ta’kidlashicha, bu kabi tashabbuslar nafaqat insonparvarlik jihatidan muhim, balki Ukraina nufuzini xalqaro maydonda yanada mustahkamlaydi. Ekspertlar va jamoatchilik esa hukumatning yanada ko‘proq fuqarolarni qaytarishiga umid boqmoqda.
