Moskvada o‘zbekistonlik taksi haydovchisi haqoratlandi: TIV javob berdi

So‘nggi kunlarda ijtimoiy tarmoqlarda keng tarqalgan video keng jamoatchilikning g‘azabi va iztirobini uyg‘otdi. Moskva viloyatida, aniqrog‘i Ximki shahrida bir rossiyalik shaxs o‘zbekistonlik mehnat muhojirini haqorat qilgani tasvirlangan holat yuzasidan mutaxassislar ham, keng omma ham keskin fikr bildirishdi.

Video yozuvida ko‘rinishicha, rossiyalik kimsa taksi haydovchisiga qo‘pol so‘zlar bilan baqirib, unga «Sen qulsan, ruslarning qulisan! Og‘zingni ochma» deya tahqirli munosabatda bo‘lgan. Shu bilan cheklanmasdan, «O‘zbekistonda hech narsa yo‘qligi uchun bizga kelgansan. Sen uyingda emassan, ishlash uchun kelgansan, ishingni qil» kabi og‘ir va haqoratomuz gaplar aytgani ayon bo‘ldi.

O‘zbekistonlik muhojir esa vaziyatni tinch yo‘l bilan hal qilishga harakat qilib, javob qaytarmagan holda vaziyatdan chiqib ketgan. Guvohlarning aytishicha, mojaro taksichining mashinasi qisqa muddat uy hovlisiga kirish yo‘lini to‘sib qo‘ygani ortidan kelib chiqqan.

Bu holat ijtimoiy tarmoqlarda katta muhokamalarga sabab bo‘lgach, O‘zbekiston Tashqi ishlar vazirligi ham befarq qolmadi. Matbuot kotibi Ahror Burhonov rasmiy bayonot berdi.

U o‘z nutqida:

— O‘zbekiston Konstitutsiyasi, milliy qonunlar va xalqaro huquqning umume’tirof etilgan me’yorlariga ko‘ra, fuqarolarimiz dunyoning qaysi nuqtasida bo‘lmasin, davlat himoyasida hisoblanadi. Agar ularning huquq va manfaatlari buzilsa, birinchi navbatda mahalliy huquq-tartibot organlariga murojaat qilishlari kerak. Shuningdek, o‘z diplomatik vakolatxonalari va konsullik muassasalari orqali huquqiy yordam so‘rash imkoniyati ham mavjud, — deya ta’kidladi.

Shu bilan birga, u davlatning o‘z fuqarolarini xorijda himoya qilish masalasini asosiy yo‘nalishlardan biri sifatida qarashini va bu mas’uliyat o‘z fuqarolari oldidagi majburiyat sifatida bajarilishini alohida urg‘ulab o‘tdi.

Shu tariqa, TIVning bayonoti Rossiyadagi ushbu holat yuzasidan O‘zbekiston fuqarolariga qo‘llab-quvvatlash va himoya kafolati borligini yana bir bor eslatdi. Bu voqea esa yurtdoshlarimizning huquqlari va qadr-qimmatini asrash qanchalik muhim ekanini yana bir bor ko‘rsatib turibdi.