Rossiya Mudofaa vazirligi 28 avgust kuni Ukraina harbiy-dengiz kuchlariga tegishli «Simferopol» nomli razvedka kemasi dron zarbasi ortidan cho‘ktirilgani haqida ma’lumot berdi. Oradan ko‘p o‘tmay ushbu hujum Ukraina harbiy-dengiz kuchlari tomonidan ham tasdiqlandi. Ta’kidlash joizki, Rossiya armiyasi uchun bu ekipajsiz kater orqali dushman kemasini yo‘q qilishdagi ilk muvaffaqiyatli urinish hisoblanadi.
Ma’lumotlarga ko‘ra, «Dumska» nashri yozganidek, hujum yarim tun atrofida amalga oshirilgan. «Simferopol» o‘sha vaqtda Dunay daryosining quyi qismida harakatlanayotgan bo‘lgan. Zarba oqibatida kemaning bortida yirik teshik hosil bo‘lgan va kema ag‘darilib, suvga cho‘kkan.
Ukraina harbiy-dengiz kuchlari rasmiy vakili Dmitriy Pletonchukning so‘zlariga ko‘ra, ekipaj a’zolarining bir qismi hozirda bedarak yo‘qolganlar ro‘yxatiga kiritilgan. Bir kishi halok bo‘lgan, yana bir nechta harbiy yaralangani haqida xabar berilmoqda.
Bu voqea Rossiya tomonidan Ukraina kemalariga qarshi dengiz dronlaridan samarali foydalanishning ilk rasmiy holati sifatida qayd etildi. Hatto, Mudofaa vazirligi ushbu hujum videosini ham e’lon qilib, keng jamoatchilik e’tiboriga havola etdi.
«Ribar» telegram-kanali esa, dron zarba berishdan avval Dunay o‘zani bo‘ylab taxminan 25 kilometr masofani bosib o‘tganini qayd etdi. Kanal mualliflarining ta’kidlashicha, ukrainalik kuzatuvchilar dronni o‘z texnikasi deb o‘ylagan bo‘lishi ham ehtimoldan xoli emas.
Shu tariqa, «Simferopol»ning cho‘ktirilishi Ukraina va Rossiya o‘rtasidagi dengizdagi to‘qnashuvlar yangi bosqichga o‘tganini anglatmoqda. Bu voqea nafaqat harbiy sohada, balki geosiyosiy jarayonlarda ham jiddiy aks-sado berishi shubhasiz.
