Turkmaniston Respublikasi hukumati 2025 yil yakuniga qadar mamlakat hududida sigaret chekishni butunlay taqiqlashni rejalashtirmoqda. Bu borada rasmiy idoralar tomonidan e’lon qilingan ma’lumotlarga ko‘ra, davlat aholisi salomatligini saqlash va kasalliklarning oldini olish maqsadida keskin choralarni amalga oshirmoqda.
Jahon sog‘liqni saqlash tashkiloti ma’lumotlariga ko‘ra, Turkmaniston aholisi soni taxminan 7 million atrofida bo‘lib, ularning faqatgina 7 foizi chekuvchilar qatoriga kiradi. Bu raqam Markaziy Osiyo davlatlari orasida eng past ko‘rsatkichlardan biri hisoblanadi. Mamlakatda bir necha yillardan buyon tamaki mahsulotlariga qarshi olib borilayotgan qat’iy siyosat o‘z samarasini bermoqda.
Ayniqsa, so‘nggi yillarda chekuvchilar soni keskin kamaygani kuzatildi. Bu jarayonga faol targ‘ibot ishlari, tamaki mahsulotlarini sotishga qo‘yilgan cheklovlar, maktab va ish joylarida maxsus ta’limiy dasturlar ta’sir ko‘rsatmoqda. Chekishga qarshi qonuniy mexanizmlar faqat shaxsiy tartibda emas, balki jamoat joylari, ishxona, muassasa va hatto transport vositalarida ham qat’iy nazorat ostiga olingan.
Shu bilan birga, Turkmanistondagi tibbiyot xodimlari ham ushbu tashabbusni qo‘llab-quvvatlashmoqda. Ularga ko‘ra, chekuvchilar sonining kamayishi nafaqat nafas yo‘llari kasalliklarini kamaytiradi, balki infarkt, insult, onkologiya kasalliklarining oldini olishda ham muhim ahamiyatga ega.
“Zamin”ni Telegramʻda oʻqing!
