AQSH davlat departamenti BMT Bosh assambleyasi doirasida ishtirok etishi kutilgan Falastin delegatsiyasi a’zolarining vizasini bekor qildi. Bu qaror ortidan Falastin rahbari Mahmud Abbos va unga hamroh bo‘lishi rejalashtirilgan 80 ga yaqin rasmiy sentyabr oyida Nyu-York shahrida bo‘lib o‘tadigan xalqaro yig‘ilishda qatnashish imkonidan mahrum bo‘ldi.
Davlat kotibi Marko Rubio Falastin tomonini «tinchlik jarayonini izdan chiqarish» va «Falastin davlatini bir yoqlama tan olishga urinish»da aybladi. Shu bilan birga, davlat departamenti vizalarni bekor qilishni «terrorchilikni rag‘batlantirmaslik siyosati» bilan izohladi.
Falastin tomoni esa AQSHning bu qadamini 1947 yilda qabul qilingan BMTning shtab-kvartirasi to‘g‘risidagi xalqaro kelishuvga zid, deb baholadi. Falastin tashqi ishlar vaziri maslahatchisi Ahmad al-Dik BMT bosh kotibi Antoniu Guterrish va a’zo davlatlarni bu masalaga jiddiy e’tibor qaratishga chaqirdi.
Jahon OAV yozishicha, AQSH BMT bosh qarorgohi joylashgan davlat sifatida har bir mamlakat vakillari uchun to‘siqsiz kirish imkoniyatini yaratishi shart. Shu bois Vashingtonning Falastinga qarshi bu qarorini ko‘plab davlatlar tanqid ostiga olmoqda.
Ma’lumotlarga ko‘ra, BMT Bosh assambleyasi sentyabr oyidagi yig‘ilishida Fransiya, Buyuk Britaniya, Kanada va Avstraliya Falastin davlatini rasman tan olishi mumkin. Shu jihatdan, AQSHning bahsli qarori Falastinni davlat sifatida tan olish jarayoniga qarshi qadam sifatida ham talqin etilmoqda.
Prezident Donald Tramp ma’muriyati esa bu bilan chegaralanmay, parallel ravishda G‘azo sektoridagi yarador bolalarni qabul qilish dasturini ham to‘xtatib qo‘ydi.
Eslatib o‘tamiz, AQSH 2023 yil 7 oktyabridan buyon G‘azo sektorida davom etayotgan va yuz minglab falastinliklar qurboniga aylangan urushda Isroilni hech qanday shartsiz moliyaviy, harbiy va diplomatik jihatdan qo‘llab-quvvatlab kelmoqda.
Shuningdek, Vashington Falastin davlatining tuzilishiga qat’iyan qarshi. O‘tgan yil 18 aprel kuni BMT Xavfsizlik kengashida Falastinning to‘liq a’zoligini ko‘zda tutuvchi rezolyutsiyani ham aynan AQSH veto qilib yo‘qqa chiqargandi. Keyinroq BMT Bosh assambleyasining navbatdan tashqari yig‘ilishida ham AQSH Falastinning xalqaro tashkilotga to‘liq qo‘shilishiga qarshi ovoz bergandi.
