“Xohlaganingizni yeng, imkoningizdan kelganini to‘lang”

Meksiko shahridagi mashhur Masala y Maiz restorani noodatiy tashabbusi bilan keng jamoatchilik e’tiborini tortmoqda. Restoran egalari mehmonlarga menyudan xohlagan taomini tanlash va buning uchun imkoniyatidan kelib chiqib to‘lash imkonini bermoqda.

Bu tashabbusning maqsadi – shaharda turlicha daromadga ega odamlarni bir xil sharoitda ovqatlanishga jalb qilish. Maxsus kunlarda restoran chek yozmaydi, balki mehmonlarga konvert beriladi. Har kim qancha to‘lay olishini o‘zi belgilaydi. Ayrimlar ko‘proq to‘lab ketadi, boshqalar esa imkoniga qarab kamroq qoldiradi. Hatto pul o‘rniga sovg‘a qoldirganlar ham bo‘ladi.

Masala y Maiz yaqinda Michelin yulduziga sazovor bo‘ldi. Bu yutuq tashabbusni yanada kengroq tanitishga yordam berdi. Shu yilning 27-avgust kuni Meksiko shahridagi 20 dan ortiq boshqa restoran ham ushbu tashabbusda qatnashdi.

Restoran egalari kelgusida bu g‘oya boshqa mamlakatlarga ham yoyilishini kutmoqda. Ularning fikricha, bunday tashabbus nafaqat iqtisodiy tengsizlikni kamaytiradi, balki jamiyatda birdamlik kayfiyatini kuchaytiradi.