28 avgust kuni Isroil havo hujumi Yaman poytaxti Sana shahrida qonli oqibatlarga olib keldi. Husiylar hukumati rahbari – bosh vazir Ahmad G‘aleb ar-Rahaviy va bir qator vazirlar hayotdan ko‘z yumdi.
Ma’lumotlarga ko‘ra, zarba aynan navbatdagi hukumat yig‘ilishi davom etayotgan vaqtda amalga oshirilgan. SABA agentligi yozishicha, isroillik harbiy kuchlar “Ansor Alloh” yetakchisining nutqini eshitish uchun to‘plangan yuqori martabali amaldorlar yig‘ilgan bir nechta joyni bir vaqtning o‘zida nishonga olgan. Reuters agentligi esa halok bo‘lganlar orasida mudofaa vaziri va bosh shtab rahbari ham borligini qayd etdi.
Eslatib o‘tish joiz, 25 avgust kuni ham Isroil Sanaga yo‘naltirilgan havo zarbasini amalga oshirgan, natijada kamida 10 kishi halok bo‘lgan, 100 dan ortiq fuqaro yaralangan edi.
Husiylar esa muntazam ravishda Isroilga qarshi raketa va dronlar yo‘llab, falastinliklar bilan birdamligini namoyon qilib keladi. Ular Qizil dengiz va Adan ko‘rfazi orqali o‘tadigan savdo kemalarini ham o‘qqa tutmoqda. Bunga javob sifatida Isroil va AQSH husiylar nazoratidagi hududlarni, jumladan poytaxt Sanani qo‘lga olish uchun zarbalar yo‘llamoqda.
Ma’lumki, husiylar 2014 yildan hokimiyat tepasiga chiqqan va 2015 yildan beri Sana shahri ustidan nazoratni qo‘lda ushlab turibdi.
Ar-Rahaviy hukumatni 2024 yil avgustidan boshlab boshqargan edi. Endi esa uning o‘rniga o‘rinbosari Muhammad Miftoh bosh vazir sifatida tayinlandi.
