Turkiyada axborot vositalari va ijtimoiy tarmoqlar faoliyati bilan bog‘liq navbatdagi cheklovlar qayd etildi. Xorijiy ommaviy axborot vositalari tarqatgan ma’lumotlarga ko‘ra, Istanbul shahrida mitinglar bo‘lib o‘tayotgan bir paytda, mashhur onlayn platformalarga kirishda jiddiy uzilishlar kuzatilmoqda.
Ma’lumotlarga ko‘ra, X (sobiq Twitter), YouTube, Instagram, Facebook, TikTok va WhatsApp kabi ommabop ijtimoiy tarmoqlar va messenjerlarga ulanishda muammolar 7 sentyabr yakshanba kuni soat 20:45 GMT atrofida boshlangan. Foydalanuvchilar mazkur platformalardan foydalanish imkoniyati cheklanganini va xizmatlar sekin ishlayotganini xabar qilmoqda.
Ekspertlar fikricha, bu cheklovlar Turkiya Internet provayderlari ittifoqi tomonidan amalga oshirilgan bo‘lishi mumkin. Biroq hozircha mazkur tashkilot tomonidan hech qanday rasmiy izoh berilgani yo‘q.
Shu bilan birga, mahalliy jurnalistlarning yozishicha, ijtimoiy tarmoqlarga kirish cheklanishi siyosiy voqealar bilan chambarchas bog‘liq. Aniqlanishicha, cheklovlar Respublika Xalq partiyasi Istanbuldagi bosh qarorgohi oldida politsiya barrikadalari o‘rnatilganidan so‘ng joriy qilingan. Mazkur holatdan keyin partiya faollari va tarafdorlari aholini ommaviy mitinglarga chorlagan.
Natijada, ko‘p o‘tmay, ijtimoiy tarmoqlar orqali tarqatilayotgan chaqiriqlar va turli videoyozuvlar tezlik bilan tarqalishining oldini olish maqsadida onlayn platformalar ishi cheklangani taxmin qilinmoqda.
