Qirg‘iziston prezidenti Sadir Japarov «Jalolobod shahrining nomini Manas deb qayta nomlash to‘g‘risida»gi qonunni imzoladi. Bu haqda davlat rahbari matbuot xizmati rasmiy xabar berdi.
Ma’lum qilinishicha, mazkur qonun Jogorku Kenesh tomonidan 2025-yil 10-sentyabrda qabul qilingan edi. Hujjatning asosiy maqsadi milliy mafkurani mustahkamlash, xalq xotirasi va madaniy merosni rivojlantirishdan iborat. Shuningdek, Jalolobod shahriga qirg‘iz xalqining buyuk qahramoni, turli bosqinlardan xalqini himoya qilgan Manas nomini berish ham ko‘zda tutilgan.
Qonun rasmiy e’lon qilingan kundan keyin, o‘n kun o‘tgach, kuchga kiradi va shundan so‘ng shahar rasmiy ravishda yangi nom – Manas deb ataladi. Bu o‘zgarish shahar aholisi va mahalliy ma’muriyat uchun muhim tarixi va madaniy ahamiyatga ega.
Jalolobod shahrining tarixiy ma’lumotlariga ko‘ra, uning rasmiy tashkil etilgan sanasi 1877-yil oktyabr oyiga to‘g‘ri keladi. Shaharning umumiy maydoni 64,6 kvadrat kilometrni tashkil qiladi va bu yerda 184 mingdan ortiq aholi yashaydi. Ularning qariyb 30 foizi o‘zbeklar bo‘lib, shahar aholisining etnik tarkibi turli millat va qavmlardan iborat.
Mahalliy olimlar va tarixchilar ta’kidlashicha, shahar nomini Manas deb o‘zgartirish, nafaqat tarixiy merosni asrab qolish, balki kelgusida mahalliy madaniy hayotni rivojlantirish va qirg‘iz xalqi madaniyatiga bo‘lgan hurmatni yanada mustahkamlashga xizmat qiladi.
Shu bilan birga, bu qaror shahar aholisi orasida ham ijobiy munosabat uyg‘otdi, chunki ular o‘z tarixiy va milliy qadriyatlariga e’tibor qaratilganini qadrlamoqda. Yangi nom shaharning madaniy imidji va turistik diqqatini ham oshirish imkonini beradi.
“Zamin”ni Telegramʻda oʻqing!
