Rossiya rahbari Vladimir Putinning yangi farmoni siyosiy maydonda jiddiy bahslarga sabab bo‘ldi. Unga ko‘ra, AQSH sobiq prezidenti Jo Baydenning sobiq yordamchisi Tara Rid endi rasman Rossiya fuqarosi hisoblanadi. Bu haqda Kreml sayti orqali ma’lum qilindi, deb yozdi RBK.
Tara Ridning nomi birinchi marta 1990-yillarda, Jo Bayden hali senator bo‘lgan paytlarda tilga olingan. U o‘sha davrda Bayden ofisida yordamchi lavozimida ishlab kelgan. Biroq, oradan o‘nlab yillar o‘tib, Rid 2020-yilda Amerika siyosatini larzaga solgan bayonot bilan chiqdi. Uning so‘zlariga ko‘ra, senatorlik faoliyati davrida Bayden tomonidan unga nisbatan zo‘ravonlik sodir etilgan.
Bu ayblovlar Jo Bayden prezidentlikka nomzodini qo‘ygan pallaga to‘g‘ri keldi va AQSH jamoatchiligida katta shov-shuv uyg‘otdi. Biroq Bayden shtabi tezkor ravishda bu bayonotlarni rad etdi va unga nisbatan hech qanday rasmiy tergov yoki ayblov qo‘yilmadi. Shuningdek, sud hujjatlarida ham Ridning bayonoti rasman tasdiqlanmadi.
2023-yilda esa Tara Ridning hayoti keskin o‘zgardi. U AQSHda o‘zini xavfsiz his qilmagani va tahdidlarga duch kelayotganini aytib, Rossiyaga ko‘chib o‘tdi. Moskvada yashay boshlaganidan keyin u RT telekanali bilan hamkorlik qilib, davlatga yaqin ommaviy axborot maydonida faol ko‘rina boshladi.
Ma’lumot uchun, Rossiya qonunchiligiga ko‘ra, fuqarolikka qabul qilinishi uchun nomzod odatda mamlakatda kamida besh yil qonuniy yashashi lozim. Biroq ayrim hollarda Prezident shaxsan qaror qabul qilishi orqali ushbu muddat talab etilmaydi. Putinning bu galgi qarori ham ana shunday alohida holat sifatida baholanmoqda.
Tahlilchilar fikricha, Tara Ridning Rossiya fuqaroligini qabul qilishi ikki davlat o‘rtasidagi siyosiy tortishuvlar fonida yana bir ramziy qadam sifatida ko‘rilishi mumkin. Chunki u nafaqat AQSH siyosiy elitasiga qarshi chiqishlari bilan tanilgan, balki Moskva rasmiylarining siyosiy rivojlantirish yo‘nalishiga mos keladigan shaxs sifatida ham e’tibor qo‘zg‘amoqda.
Shu tariqa, Tara Ridning shaxsiy hayotidagi burilish nafaqat uning taqdirini, balki geosiyosiy manzaradagi bahslarni ham yanada qizitishi aniq.
“Zamin”ni Telegramʻda oʻqing!
