Donald Trampning AQSH 45- va 47-prezidenti sifatidagi rasmiy portretlari orasida avtopero — avtomatik imzo qo‘yish qurilmasi tasviri paydo bo‘ldi. Ushbu surat Oq uyning ijtimoiy tarmoqdagi sahifasida 24 sentyabr kuni jamoatchilikka e’lon qilindi.
Ma’lumotlarga ko‘ra, avtopero Jo Baydenning prezidentlik davrining so‘nggi bosqichlarida qo‘llanilgan. Xususan, mahbuslarni afv etish yoki chiqarilgan hukmlarni yumshatish kabi qarorlarni rasmiylashtirishda aynan shu qurilmadan foydalanilgan. Baydenning o‘zi bu qarorlarni shaxsan ma’qullaganini ta’kidlagan, yordamchilari esa «juda ko‘p hujjatlar yuritilgani» sababli avtoperodan amaliy maqsadda foydalanishga majbur bo‘lganini aytgan.
Biroq Donald Tramp bu usulni qonuniy hisoblamaydi. Uning fikricha, Baydenning afv to‘g‘risidagi qarorlari haqiqiy kuchga ega emas, chunki ularda shaxsiy dastxat emas, balki avtopero orqali qo‘yilgan imzo mavjud. Trampga ko‘ra, mazkur qurilmadan sobiq prezidentning o‘zidan bexabar holda foydalanishgan. Bayden esa bu ayblovlarni keskin rad etib kelmoqda.
Shu bilan birga, Tramp ikkinchi prezidentlikka saylanganidan so‘ng, Oq uydagi rasmlar tartibida ham o‘zgarishlar qildi. Jumladan, u sobiq prezident Barak Obamaning portretini qasrning yopiq qismiga ko‘chirishni buyurgan. Shuningdek, katta Jorj Bush va kichik Jorj Bush portretlari ham kamroq ko‘rinadigan joylarga ko‘chirilgani ma’lum qilindi.
Bu voqea nafaqat Oq uyning ichki an’analari, balki prezidentlik hujjatlari qonuniyligi va ularning rasmiy kuchiga oid munozaralarga ham katta turtki berdi. Tramp tarafdorlari Bayden davridagi afvlar haqiqiy emasligini ta’kidlasa, Bayden tomoni bu usulni qonuniy va zarur deb hisoblamoqda.
“Zamin”ni Telegramʻda oʻqing!
