Xitoy dunyoda eng ko‘p issiqxona gazlarini chiqaruvchi davlat sanaladi. Prezident Si Szinpin BMT yig‘ilishida mamlakat 2035-yilgacha chiqindilarni 7–10 foizga kamaytirishini aytdi. Bu Xitoyning birinchi bor aniq raqam bilan chiqindilarni qisqartirish majburiyatini olishi bo‘ldi.
Mutaxassislar bu qarorni ijobiy qadamlardan biri deb baholashdi. Lekin ular xalqaro maqsadlarga erishish uchun bu ko‘rsatkich yetarli emasligini ham ta’kidlashmoqda. Chunki global haroratni 1,5 darajadan pastda saqlash uchun yanada katta qisqartirish zarur.
Rejaga ko‘ra, Xitoy shamol va quyosh elektr stansiyalarini kengaytiradi, o‘rmon maydonlarini oshiradi va yangi mashinalarda asosan elektr transportni yo‘lga qo‘yadi. Mamlakat allaqachon ba’zi ko‘rsatkichlarda belgilangan muddatdan oldin natijalarga erishgan.
Shu bilan birga, Xitoy hanuz ko‘mirga katta darajada tayanmoqda. Mutaxassislar fikricha, chiqindilarni keskin kamaytirish uchun yanada qat’iy choralar ko‘rilishi kerak. Ammo bu va’da Xitoyning kelajakda ekologik masalalarga jiddiyroq yondashayotganidan dalolat beradi.
“Zamin”ni Telegramʻda oʻqing!
