Kiyev Vengriya tomonidan Ukrainaga qarshi uchuvchisiz uchish qurilmalari razvedka maqsadida ishlatilgan bo‘lishi mumkinligidan shubhalanmoqda. Bu haqda Ukraina prezidenti Volodimir Zelenskiy 26 sentyabr kuni harbiy idoralar rahbarlari bilan o‘tkazilgan yig‘ilishdan so‘ng ma’lum qildi. Unga taqdim etilgan hisobotga ko‘ra, mamlakat g‘arbida Ukraina havo hududi buzilgani qayd etilgan.
Zelenskiyning so‘zlariga ko‘ra, voqea Ukraina–Vengriya chegarasi yaqinida sodir bo‘lgan va o‘sha yerda harakat qilgan dronlar «ehtimol Vengriyaga tegishli» bo‘lishi mumkin. Uning aytishicha, dastlabki harbiy baholarga ko‘ra, mazkur uchuvchisiz qurilmalar Ukraina chegaradosh hududlardagi sanoat quvvatini kuzatish bilan shug‘ullangan.
Shu bilan birga, Zelenskiy mavjud ma’lumotlarni yana bir bor chuqur tekshirish haqida topshiriq berganini qayd etdi.
Eslatib o‘tamiz, shu yil may oyida Ukraina Xavfsizlik xizmati (SBU) Vengriya harbiy razvedkasining mamlakatdagi josuslik tarmog‘i fosh etilganini ma’lum qilgandi. Bu holat Kiyev va Budapesht o‘rtasidagi ilgaridan mavjud bo‘lgan keskin munosabatlarni yanada og‘irlashtirgan edi.
Vengriya esa Zelenskiyning ayblovlarini keskin rad etib, «u shunday narsalarni o‘ylab topmoqda» deya bayonot berdi. Budapeshtning fikricha, Kiyevning bu kabi bildiruvlari asossiz va vaziyatni sun’iy tarzda keskinlashtirishga qaratilgan.
“Zamin”ni Telegramʻda oʻqing!
