Birlashgan Millatlar Tashkiloti (BMT) xabar berishicha, Isroilning davom etayotgan havo va yer hujumlari natijasida G‘azodagi vaziyat tobora yomonlashib bormoqda. Aholi yashaydigan hududlarda katta vayronagarchilik yuz berib, ko‘p sonli qurbonlar qayd etilmoqda. Bu haqda BMT Bosh kotibi matbuot kotibi Stefan Dyujarrik kundalik matbuot anjumanida ma’lum qildi.
Dyujarrikning so‘zlariga ko‘ra, BMT gumanitar yordam xodimlari G‘azo shimolidagi vaziyat keskin yomonlashgani haqida xabar bermoqda. Isroilning uzluksiz va kuchli bombardimonlari tinch aholi o‘limi va turar-joy binolarining vayron bo‘lishiga sabab bo‘lmoqda. Shu bilan birga, gumanitar xodimlar xavfsizligi katta xavf ostida qolmoqda.
Ma’lumotlarga ko‘ra, 3 oktyabr kuni Isroilning navbatdagi havo hujumi natijasida kasalxona oldidagi avtobus bekatida turgan bir gumanitar xodim halok bo‘lgan, yana to‘rt nafari og‘ir jarohat olgan. 8 oktyabrdan beri G‘azoda kamida 562 nafar yordam xodimi halok bo‘lgan, ularning 376 nafari BMT xizmatchilari bo‘lgan. Bu raqamlar BMTning insonparvarlik missiyasiga qanchalik katta xavf solayotganini ko‘rsatadi.
“Zamin”ni Telegramʻda oʻqing!
