Misr G‘azo bo‘yicha HAMAS–Isroil muzokarasini boshlatmoqchi

Misr 6 oktyabr kuni AQSH prezidenti Donald Tramp taklif etgan tinchlik tashabbusi doirasida Isroil va HAMAS vakillarini uchrashuvga chorladi. Qohira TIVning ta’kidlashicha, maqsad — G‘azoda o‘t ochishni to‘xtatish va garovdagilarni falastinlik mahbuslarga almashish bo‘yicha muzokaralarni tezkor yo‘lga qo‘yish, mintaqaviy hamda xalqaro sa’y-harakatlarga yangi sur’at berish.

Uchrashuv manzili rasman aniqlanmagan: ayrim nashrlar muloqot Sharm Al-Shayxda o‘tishi mumkinligini yozgan bo‘lsa, boshqalar Qohirani tilga olmoqda. Manbalarga ko‘ra, Isroil delegatsiyasiga strategik rejalashtirish vaziri, bosh vazir Binyamin Netanyahuga yaqin Ron Dermer rahbarlik qiladi.

Tramp rejasiga muvofiq, HAMAS roziligini tasdiqlashi bilanoq o‘t ochishni to‘xtatish kuchga kiradi. Netanyahu esa harakatni va butun G‘azoni diplomatik yoki harbiy yo‘l bilan qurolsizlantirish niyatini ochiq aytdi: «Bu oson bo‘lsin yo qiyin — baribir amalga oshadi».

HAMAS tomoni «almashinuv uchun zarur sharoitlar yaratilsa», tirik garovdagilar va halok bo‘lganlarning jasadlarini «prezident Tramp taklif etgan formula» asosida Isroilga topshirishga tayyorligini bildirdi. Shu bilan birga, harakat kelishuv detallarini vositachilar orqali darhol muhokama qilishni ma’qulladi. Tashkilot G‘azo boshqaruvini «Falastin milliy konsensusi hamda arab-islom ko‘magi»ga tayangan mustaqil organga o‘tkazishga ham tayyor ekanini bildirdi, ammo qurolsizlanish shartlari bo‘yicha rozilik bildirmadi. Qatardagi rahbarlar rejaning ayrim bandlarini qayta ko‘rib chiqishni talab qilmoqda.

Misrning tashabbusi tomonlarni bir stol atrofida jamlashga qaratilgan navbatdagi urinish bo‘lib, natija ko‘p jihatdan rejim o‘t ochishni to‘xtatishning ketma-ketligi, almashuv sharti va xavfsizlik kafolatlari ustidagi kelishuvlarga bog‘liq bo‘ladi.