Eron oliy rahbari Ali Xomanaiy AQSH prezidenti Donald Trampning Eron bilan muzokaralarni qayta boshlash haqidagi taklifini rad etdi, deb xabar berdi reuters.com.
Xomanaiy o‘z chiqishida Trampning bayonoti — ya’ni AQSH Eronning yadroviy salohiyatini yo‘q qilgani haqidagi gaplar — haqiqatga mos emasligini ta’kidladi. Uning so‘zlariga ko‘ra, agar muzokara majburlash va tahdid bilan olib borilsa, bu bitim emas, balki bosim vositasi hisoblanadi.
«Tramp o‘zini “bitimlar ustasi” deb ataydi. Ammo agar kelishuv tahdid va bosim bilan amalga oshirilsa, bu hech qanday haqiqiy bitim emas. Bu faqat majburlash va qo‘rqitishdir», — dedi Eron rahbari.
Xomanaiy shuningdek, Trampning Eron yadroviy sanoati yo‘q qilingani haqidagi bayonoti ustidan kuldi. Uning ta’kidlashicha, AQSH prezidenti bu haqda faqat «orzu qilishda davom etishi» mumkin, chunki Eronning ilmiy va texnologik quvvati saqlanib qolmoqda.
Ma’lumot uchun, avvalroq Tehron va Vashington yadroviy dastur bo‘yicha besh marotaba bilvosita muzokara o‘tkazgan. Biroq ular iyun oyida Isroil va AQSH Eron yadroviy inshootlariga zarba berganidan so‘ng keskin to‘xtatilgan va 12 kun davom etgan havo jangi bilan yakunlangan.
O‘tgan hafta Tramp Isroil parlamentida so‘zlar ekan, G‘azoda HAMAS bilan sulhdan keyin AQSH Eron bilan «tinchlik kelishuvi» tuzishi mumkinligini aytgandi. Ammo G‘arb davlatlari hanuz Eronni yashirin tarzda yadroviy qurol ishlab chiqarishda ayblab kelmoqda. Tehron esa bu da’volarni rad etib, uran boyitish faqat fuqarolik energetikasi maqsadlariga qaratilganini ta’kidlaydi.
Sentyabr oyi oxirida BMT Eronga qarshi sanksiyalarni qayta joriy etganini ma’lum qildi. Buyuk Britaniya, Germaniya va Fransiyaning hisob-kitoblariga ko‘ra, Tehron 10-yil avval tuzilgan uranni boyitish bo‘yicha kelishuv shartlarini buzgan.
Shunday qilib, Xomanaiyning so‘nggi bayonoti Eron va AQSH o‘rtasidagi munosabatlarning yaqin vaqtlarda yumshashi ehtimolini deyarli yo‘qqa chiqardi. Eron rasmiylari bu pozitsiyani mamlakat mustaqilligi va milliy xavfsizligini himoya qilish uchun zarur chora sifatida izohlamoqda.
“Zamin”ni Telegramʻda oʻqing!
