Pekinda Xitoy Kommunistik partiyasining to‘rt kunlik yig‘ilishi yakunlandi. Si Szinpin rahbarligida o‘tgan yig‘ilishda mamlakatning yangi besh yillik iqtisodiy rejasi muhokama qilindi. Uchrashuv yakunida e’lon qilingan bayonot Xitoy siyosatida yangi davr boshlanganidan darak bermoqda. Unda korrupsiyaga qarshi kurash, texnologik mustaqillik va ichki iqtisodiy faollik asosiy yo‘nalish sifatida belgilandi.
Eng ko‘p e’tibor tortgan masala — korrupsiyaga qarshi kurashdir. Yig‘ilishga Markaziy qo‘mitaning 205 a’zosidan 168 kishi qatnashdi, qolganlar turli sabablarga ko‘ra yo‘q edi. Bu esa yangi tekshiruvlar boshlanganidan dalolat beradi. Ayniqsa, harbiylar orasida bir nechta yuqori lavozimdagi generallar lavozimidan bo‘shatilgani Xitoy rahbariyatining ichki “tozalash” siyosatini kuchaytirayotganini ko‘rsatadi.
Yig‘ilishda muhokama qilingan ikkinchi yo‘nalish — texnologiyada mustaqillikka erishish. Xitoy AQSh bilan davom etayotgan savdo ziddiyatlari sabab o‘z texnologik imkoniyatlarini mustahkamlashga kirishmoqda. Si Szinpin “ilm-fan va texnologiyada o‘z kuchiga tayanish”ni strategik maqsad sifatida belgiladi. Bu siyosat orqali Xitoy xorijiy texnologiyalarga qaramlikni kamaytirib, o‘z sanoatini ilg‘or texnologiyalar bilan rivojlantirmoqchi.
Uchinchi muhim masala — ichki bozorni jonlantirishdir. Eksportga tayanib kelayotgan Xitoy endilikda aholining o‘z ichki iste’molini oshirishni maqsad qilmoqda. Biroq uy-joy inqirozi va yoshlar ishsizligi bunga to‘sqinlik qilmoqda. Mutaxassislar fikricha, hukumat aholining ishonchini oshirmas ekan, ichki iste’molni kuchaytirish qiyin bo‘ladi.
Umuman olganda, Xitoy uchun hozirgi davr sinovli bo‘lib, siyosiy barqarorlik, iqtisodiy o‘sish va texnologik mustaqillik bir-biri bilan chambarchas bog‘liq. Si Szinpin boshchiligidagi rahbariyat bu uch sohada muvozanatni saqlab qolishga harakat qilmoqda.
“Zamin”ni Telegramʻda oʻqing!
