Yevropada qush grippi erta mavsumdayoq keng tarqala boshladi. Mutaxassislarning aytishicha, bu so‘nggi o‘n yil ichidagi eng erta va keng ko‘lamli tarqalish hisoblanadi. O‘nlab mamlakatlarda kasallik qayd etilayotgani parranda xo‘jaliklariga va oziq-ovqat ta’minotiga jiddiy xavf tug‘dirmoqda. 2022-yilda shunga o‘xshash holat natijasida millionlab parranda yo‘q qilingan edi.
Kasallik, asosan, ko‘chib yuruvchi yovvoyi qushlar orqali tarqalmoqda. Avgustdan oktyabr o‘rtalarigacha Yevropa Ittifoqining o‘n davlati va Buyuk Britaniyada 50 dan ortiq holat aniqlangan. Eng ko‘p zararlangan mamlakatlar — Polsha, Ispaniya va Germaniya. Mutaxassislar virusning erta tarqalishi bu yilgi qish mavsumini yanada og‘irlashtirishi mumkinligini ogohlantirmoqda.
Belgiyada va Fransiyada yangi holatlar aniqlangach, hukumatlar barcha parrandalarni yopiq joylarda saqlashni buyurdi. Bu chora kasallik tarqalishini cheklash uchun zarur deb hisoblanmoqda. Odatda bunday choralar qishda qo‘llanilar edi, ammo bu safar kasallikning erta tarqalishi hukumatlarni oldindan harakat qilishga majbur qilmoqda.
Jahon sog‘liqni saqlash tashkiloti virusning insonlarga yuqish xavfi pastligini bildirgan. Shunga qaramay, u hayvonlardan odamlarga o‘tishi mumkin bo‘lgan hollarga e’tibor bilan qarash kerakligini eslatmoqda. Fransiyada o‘rdaklarga qarshi emlash kampaniyasi boshlangan bo‘lib, bu kasallikni jilovlashda muhim qadam sifatida baholanmoqda.
Qush grippi Yevropadan tashqari AQSh, Osiyo va boshqa mintaqalarda ham kuzatilmoqda. AQShda 180 milliondan ortiq parranda yo‘q qilingan, Braziliya esa kasallikdan xoli hudud sifatida e’lon qilingan.
“Zamin”ni Telegramʻda oʻqing!
