Rossiyaliklar bu yil yozda ham asosiy dam olish manzili sifatida Turkiyani tanladi. Yagona idoralararo axborot-statistika tizimi tahliliga ko‘ra, 2025 yilning iyul-sentyabr oylarida Rossiya aholisi ushbu mamlakatga 2,7 million marta tashrif buyurgan - bu so‘nggi to‘rt yildagi eng yuqori ko‘rsatkich.
O‘tgan yilga nisbatan sayyohlar oqimi 6,4 foizga oshdi. Bunday raqamlar shuni ko‘rsatadiki, Turkiya rossiyalik sayyohlar uchun eng talabgir yo‘nalishlardan biri bo‘lib qolmoqda. Oxirgi marta bunday faollik 2021 yilda kuzatilgan bo‘lib, xuddi shu davrda 2,8 million sayohat qayd etilgan.
2025 yilning to‘qqiz oyida Turkiyaga 5,3 million rossiyalik tashrif buyurgan. Taqqoslash uchun, pandemiyadan oldin ko‘rsatkichlar biroz yuqori edi - 2019 yilning uch choragida u yerga 5,9 million kishi borgan. Ekspertlar mamlakatga bo‘lgan qiziqishning ortishini qulay vizasiz rejim, barqaror aviaqatnovlar va dam olish uchun nisbatan arzon narxlar bilan bog‘lamoqda.
Antaliya, Alaniya va Bodrum oilaviy sayohatlar va plyaj ta’tillari uchun sevimli joylar bo‘lib qolmoqda. Rossiyalik sayyohlar yuqori darajadagi xizmat ko‘rsatish, barcha xizmatlarni o‘z ichiga olgan paketlar va mavsumni deyarli oktyabr oyining oxirigacha uzaytiradigan yoqimli iqlimni maqtashadi.
“Zamin”ni Telegramʻda oʻqing!
