Isroillik tadqiqotchilar inson umrini uzaytirish yo‘lida ahamiyatli bir kashfiyotga erishdi. Ularning Nature Aging jurnalida e’lon qilingan ishlari biologik qarishning yashirin mexanizmlariga yana bir yorug‘lik tashladi.
Mutaxassislar CD4-Eomes deb ataluvchi noodatiy T-hujayra turini aniqladi. Bu hujayralar organizmda muddatini o‘tab bo‘lgan, to‘qimalarga zarar keltirishi mumkin bo‘lgan senescent hujayralarni topib, ularni yo‘q qilishga yordam beradi. Aynan mana shu qarigan hujayralarning ko‘payishi insonda zaiflik, yallig‘lanish va xastalik xavfini oshiradi.
Tajribalar shuni ko‘rsatdiki, agar ushbu maxsus hujayralar qisqarsa, tanada qarish jarayoni tezlashadi: mushaklar quriydi, organlar faoliyati susayadi, umr davomiyligi qisqaradi. Ammo ular o‘rinli saqlansa yoki kuchaytirilsa, aksincha, qarish jarayoni sekinlashishi mumkin.
Qizig‘i shundaki, CD4-Eomes hujayralari uzoq umr ko‘rgan odamlarda ko‘proq uchragan. Olimlar bundan kelib chiqib, bu hujayralar tanada qarishga qarshi kuchli “qurol” vazifasini o‘tashi mumkinligini aytishmoqda.
Tadqiqotchilarning fikriga ko‘ra, kelajakda shu hujayralarni sun’iy tarzda ko‘paytirish yoki faollashtirish imkoni paydo bo‘lsa, inson umrining sog‘lom qismi sezilarli oshishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
