Mayami shahrida AQSH va Ukraina rasmiylari Rossiya boshlagan keng ko‘lamli urushni to‘xtatishga qaratilgan ehtimoliy tinchlik yo‘lxaritasi bo‘yicha faol muzokaralar olib bormoqda. Axios portaliga ko‘ra, juma kuni bo‘lib o‘tgan uchrashuvlarda ikki davlat vakillari mojaroni bosqichma-bosqich yumshatish bo‘yicha bir qator takliflar va yangi g‘oyalarni muhokama qilgan.
Ukraina tomonidan muzokaralarga Milliy xavfsizlik va mudofaa kengashi kotibi Rustem Umerov hamda Bosh shtab boshlig‘i Andrey Gnatov boshchilik qilmoqda. Ular kecha AQSH prezidenti Donald Trampning maxsus vakillari — hafta boshida Moskvada bo‘lgan Stiven Uitkoff va Jared Kushner bilan ikki soat davom etgan muloqotni amalga oshirdi. Suhbat “ijobiy ruhda” kechgani ma’lum qilindi. Bugungi muzokaralar ham davom etdi va shanba kuni yana bir raund rejalashtirilgan.
Uitkoff va Kushnerning Ukraina delegatsiyasi bilan muloqoti ularning Putin bilan 2-dekabrda Moskvada amalga oshirgan besh soatlik uchrashuvidan keyin o‘tkazilayapti. Moskvadagi muzokaralardan so‘ng Rossiya tomoni tinchlik formulasi bo‘yicha “murosali variant ko‘rinmayotganini” bildirgan edi. Shu bois Mayamidegi muhokamalar ikki taraf pozitsiyalaridagi qarama-qarshiliklarni yumshatishga qaratilgan muhim bosqich sifatida baholanmoqda.
Axios manbasiga ko‘ra, AQSH vakillari ukrain delegatsiyasini Moskvadagi suhbat tafsilotlari hamda ziddiyat nuqtalarini yengib o‘tishga ko‘mak berishi mumkin bo‘lgan yangi takliflar bilan yaqindan tanishtirgan.
Shunisi qiziqki, Ukraina va Rossiyaning ommaga aytgan rasmiy bayonotlari bir-biridan juda farq qilsa-da, Vashingtonda hali ham hududiy masala kabi eng og‘ir nuqtalar bo‘yicha ham murosa topish ehtimoli bor, degan ishonch saqlanib turibdi.
Urushning kelgusi manzili aynan mana shunday muloqotlarda belgilanayotgan bir paytda, Mayamidegi muzokaralar xalqaro hamjamiyat diqqat markazida qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
