Rossiya Donald Tramp ma’muriyati e’lon qilgan yangi AQSh Milliy xavfsizlik strategiyasini “asosan Moskva qarashlariga mos” deb baholadi. Hujjatda Rossiya tahdid sifatida ko‘rsatilmagan, Yevropa esa “sivilizatsion xavf” ostida ekani aytilgan. Strategiyada xorijiy ta’sirlarga qarshi kurashish, migratsiyani nazorat qilish va Yevropa Ittifoqidagi senzuraga qarshi turish ustuvor vazifalar sifatida ko‘rsatilgan.
Kreml so‘zlovchisi Dmitriy Peskov hujjatni ijobiy baholadi, ammo yakuniy xulosaga faqat uni batafsil tahlil qilgachgina kelishlarini bildirdi. Strategiya Rossiyaga nisbatan yumshoq tilda yozilgani bilan ajralib turadi, bu esa Yevropa rasmiylarini xavotirga solmoqda. Hujjatda AQShning urushni tugatish bo‘yicha sa’y-harakatlariga Yevropa to‘sqinlik qilayotgani va Rossiya bilan barqarorlikni tiklash zaruriyati ta’kidlangan.
Hujjat Yevropadagi “milliy ruhni tiklash” va siyosiy partiyalarni qo‘llab-quvvatlashni ham nazarda tutadi. Unda Yevropa kelajakda tanib bo‘lmas holga kelishi va iqtisodiy muammolari sivilizatsion xavf oldida kichik ahamiyatga ega ekanligi aytilgan. AQSh Yevropadagi hamkorlarini ruhiy tiklanishni qo‘llab-quvvatlashga chaqiradi.
Strategiyada “Amerika birinchi” siyosati ta’kidlangan. Hujjat Karib dengizi va Sharqiy Tinch okeanida giyohvand moddalar kontrabandasi bilan kurashish va Venesuelada ehtimoliy harbiy harakatlarni ko‘rib chiqishni nazarda tutadi. Shuningdek, Yaponiya, Janubiy Koreya, Avstraliya va Tayvandagi mudofaa xarajatlarini oshirish talab etilgan. AQShdagi demokratlar strategiya xalqaro aloqalarga salbiy ta’sir qilishi mumkinligini bildirgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
