Ukraina prezidenti Volodimir Zelenskiy Rossiya–Ukraina o‘rtasidagi ziddiyatni hal etish jarayoni haqida fikr bildirib, yil oxiriga qadar bir qator hal qiluvchi qarorlar qabul qilinishi mumkinligini ta’kidladi. Uning so‘zlariga ko‘ra, ayni kunlar diplomatik faollik nuqtayi nazaridan juda muhim davr hisoblanadi.
«Hozir yilning eng jadal diplomatik kunlari kechmoqda. Yangi yilga qadar ko‘p masalalar o‘z yechimini topishi mumkin», — dedi Zelenskiy o‘z chiqishida. Prezident bu jarayonda faqat Ukraina emas, balki xalqaro hamkorlarning pozitsiyasi ham katta ahamiyatga ega ekanini alohida qayd etdi.
Zelenskiyning ta’kidlashicha, kelishuvlar va keyingi qadamlar ko‘p jihatdan ittifoqchi davlatlarning siyosiy irodasi, bosimi va faol ishtirokiga bog‘liq. Shu boisdan, bugungi diplomatik muloqotlar kelgusi oylar taqdiriga jiddiy ta’sir ko‘rsatishi mumkin.
Ma’lum qilinishicha, 28 dekabr, yakshanba kuni AQSH prezidenti Donald Tramp Floridada Volodimir Zelenskiy bilan uchrashuv o‘tkazadi. Bu uchrashuv xalqaro maydonda katta qiziqish uyg‘otmoqda, chunki u muzokaralar jarayonida yangi sahifa ochishi mumkin.
Eslatib o‘tish joiz, Donald Tramp avvalroq Ukraina prezidenti bilan muayyan kelishuvga erishish imkoniyatini yuqori baholagan edi. Endi esa yil yakunlanishi arafasida ushbu uchrashuv qanday natija berishi butun dunyo e’tibor markazida turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
