Avstriyaning g‘arbiy qismida, Zalsburg viloyatidagi tog‘larda ketma-ket sodir bo‘lgan ikki ko‘chki oqibatida besh nafar chang‘ichi halok bo‘ldi, yana bir nechta odam qutqarib qolindi. Hodisalar Zalsburg shahri janubida joylashgan Pongau hududida qayd etilgani aytilmoqda.
Ma’lumotlarga ko‘ra, birinchi ko‘chki 17 yanvar kuni Bad Hofgastein atrofida, taxminan 2200 metr balandlikda sodir bo‘lgan. Qor massasi ostida qolgan ayol chang‘ichi qutqaruvchilar tomonidan chiqarib olingan bo‘lsa-da, keyinchalik u vafot etgan. Uning turmush o‘rtog‘i esa omon qolgani qayd etilgan.
Oradan taxminan 90 daqiqa o‘tgach, Gastein vodiysi tomonlarda ikkinchi ko‘chki yuz bergan. U yerda yetti nafar chang‘ichi qor qoplami ostida qolib ketgan: to‘rt kishi shu zahoti halok bo‘lgan, ikki kishi jarohat olgan (ulardan biri og‘ir ahvolda), yana bir chang‘ichi esa tan jarohatisiz qutulgan.
Fojia joyiga tezkor tarzda to‘rtta qutqaruv vertolyoti, tog‘-qutqaruv xizmatlari, Qizil Xochning maxsus itlar guruhlari va inqiroz holatlariga javob beradigan mutaxassislar jalb qilingan. Qidiruv-qutqaruv ishlari bir necha soat davom etgani xabar qilinmoqda.
“Zamin”ni Telegramʻda oʻqing!
