Janubiy Koreyada shov-shuvli ish yakun topdi: sobiq birinchi xonim Kim Gon Xi korrupsiya ishi bo‘yicha aybdor deb topilib, 20 oy (1 yil 8 oy) muddatga ozodlikdan mahrum qilindi. Hukm hali qonuniy kuchga kirmagan — himoya tomoni apellyatsiya berish imkoniyatiga ega.
Sud materiallariga ko‘ra, Kim Gon Xi “Birlashtirish cherkovi” (Unification Church) vakillaridan qimmatbaho sovg‘alarni — jumladan, olmos taqinchoq va lyuks aksessuarlarni — ma’lum siyosiy moyillik/iltifot evaziga noqonuniy olgan, degan xulosaga kelindi. Shuning uchun u jazoga tortildi, noqonuniy olingan buyumlar musodara qilinishi ham aytilmoqda.
Biroq ishning ikkinchi qismida sud ehtiyotkor bo‘ldi: aksiyalar bilan manipulyatsiya va siyosiy moliyalashtirish qonunlari buzilgani kabi ayrim ayblovlar bo‘yicha dalillar yetishmasligi sabab Kim xonim oqlandi. Ya’ni “hammasiga birdek” emas — bir qismi tasdiqlandi, bir qismi yo‘q.
Kim 2025 yil avgust oyida hibsga olindi. Bunda uning «Birlashtirish cherkovi»dan olgan olmos taqinchog‘i asosiy rol o‘ynadi. Kim birinchi xonim maqomi tufayli «ayblovlar yomg‘iriga qaramay» 5 yil davomida javobgarlikdan qochib kelgan.
Bu voqea alohida emas: Kim Gon Xining turmush o‘rtog‘i — sobiq prezident Yun Sok Yol ham 2024 yil dekabrdagi harbiy holat (martial law) bilan bog‘liq ishlarda javobgarlikka tortilgan va 2026 yil 16 yanvardagi sud qarorlari doirasida 5 yillik qamoq jazosini olgani xabar qilingan. Uning oldinda yana og‘irroq ayblovlar bo‘yicha qarorlar kutilyapti.
Xulosa bitta: Seulda “lavozim — bronejilet” emas ekan. Endi asosiy savol — apellyatsiyada qaror qanchalik o‘zgaradi va siyosiy sahnada bu hukm qanday to‘lqin beradi.
“Zamin”ni Telegramʻda oʻqing!
