Ka’ba kisvasi bo‘laklari Epshteynga sovg‘a sifatida yuborilgani ochiqlandi

Jeffri Epshteyn ishi bo‘yicha yaqinda oshkor qilingan hujjatlarda Makkadagi Ka’badan muqaddas mato — Kisva bo‘laklari AQSHga jo‘natilgani haqida ma’lumotlar uchradi. Xabarda aytilishicha, jo‘natmalar Birlashgan Arab Amirliklari bilan bog‘liq aloqalar orqali tashkil etilgan va Epshteynga yetkazib berilgan.

Hujjatlarda qayd etilishicha, 2017 yil fevral–mart oylarida Aziza al-Ahmadiy ismli tadbirkor ayol Abdulloh al-Maari bilan hamkorlikda Ka’bani qoplaydigan qora, oltin kashtali Kisvaning uchta bo‘lagini jo‘natgan.

Kisva islom olamida nihoyatda muqaddas sanaladi: har yili Ka’badan eski mato olinib, o‘rniga yangisi o‘rnatiladi. Oldingi Kisva qismlari esa diniy va tarixiy ahamiyatga ega nodir artefakt sifatida qaraladi.

Epshteyn fayllariga ko‘ra, yuk Saudiya Arabistonidan Floridaga British Airways orqali havo yuklari yo‘li bilan yuborilgan. Jo‘natma 2017 yil mart oyida Epshteynning Floridadagi uyiga yetkazilgani aytilmoqda. Shu paytga kelib u allaqachon jinsiy jinoyatchi sifatida sudlangan va ro‘yxatga olingan edi.

Elektron xatlardan birida Ahmadiy Epshteynga murojaat qilib, matoning diniy ahamiyatini alohida ta’kidlagani qayd etilgan. Biroq yozishmalarda bu buyumlar nega aynan unga yo‘llangani va tomonlar o‘rtasidagi tanishuv qanday boshlangani ochiqlanmagan.