Uzoq yashash sirini qidirgan odamlar ko‘p. Lekin ba’zi joylarda bu “sir” allaqachon oddiy odatga aylangan: kamroq go‘sht, ko‘proq o‘simlik mahsulotlari.
Uzoq umr bo‘yicha ekspert, Den Byuttner (National Geographic stipendiyati) dunyoning 100 yoshdan oshganlar eng ko‘p uchraydigan “ko‘k hudud”larini o‘rgangan. Bu hududlar: Okinava, Sardiniya, Nikoya, Ikariya va Loma-Linda.
Ekspertning ta’kidlashicha, bu yerlardagi odamlar go‘shtdan butunlay voz kechmagan — ya’ni vegan emas. Lekin ular go‘shtni “asosiy qahramon” qilmaydi: har ovqatga qo‘shmaydi, ratsionning markazida sabzavot, mevalar, ko‘katlar, yong‘oq va urug‘lar turadi. Go‘sht esa ko‘pincha haftada bir-ikki marta, oz miqdorda iste’mol qilinadi.
Byuttnerning fikriga ko‘ra, sog‘liq nuqtayi nazaridan kuniga bir porsiya go‘sht iste’mol qilish mumkin, lekin me’yoridan oshirib, har bir ovqatni go‘sht bilan “to‘ldirish” yaxshi emas. Chunki go‘sht miqdori ko‘paysa, surunkali kasalliklar xavfi ham oshib borishi mumkin.
Tadqiqotlarda “ko‘k zonalar”dagi uzoq umr ko‘ruvchilar taomnomasida dukkaklilar (ayniqsa, loviya/no‘xat/mosh), ko‘katlar va tozalanmagan uglevodlarga boy ekani ko‘p qayd etiladi. Ya’ni, kuch va to‘yimlilikni ular ko‘pincha go‘shtdan emas, oddiy va tabiiy mahsulotlardan oladi.
“Zamin”ni Telegramʻda oʻqing!
