Vladimir Putinning 8 mart munosabati bilan yo‘llagan tabrigining tahrirlanmagan videosi tasodifan internetda e’lon qilinib ketdi. Ushbu holat Kreml matbuot xizmati tomonidan texnik xatolik sabab yuz bergani aytilmoqda.
Tarqalgan videoda Putin tabrik nutqini yozib olish jarayoni aks etgan. Kadrlarda u bir necha bor gapni to‘xtatib, nutqni qayta boshlashni so‘raydi. Bir payt u: “Boshqatdan gapira qolay, tomog‘im qirildi”, deya murojaat qiladi. Bu esa videoning montaj qilinmagan, ya’ni xom holdagi versiyasi ekanini ko‘rsatadi.
Odatda davlat rahbarlarining bayram tabriklari oldindan tayyorlanib, bir necha marta yozib olinadi va keyin montaj qilinib e’lon qilinadi. Biroq bu safar texnik yoki tashkiliy xatolik tufayli tahrirlanmagan variant ommaga chiqib ketgani aytiladi.
Ijtimoiy tarmoq foydalanuvchilari esa ushbu holatni qiziqarli voqea sifatida muhokama qilmoqda. Ayrimlar buni oddiy texnik xato deb baholasa, boshqalar Kreml axborot xizmati ishidagi e’tiborsizlik sifatida ko‘rmoqda.
