Yaqin Sharqdagi taranglik ortib borayotgan bir paytda Eron harbiy tayyorgarligi borasida yangi bayonot berildi. Mamlakat Qurolli kuchlari uzoq muddatli harbiy to‘qnashuvlarga tayyor ekani ta’kidlanmoqda.
Eron Islom inqilobi qo‘riqchilari korpusi (IIQK) rasmiy vakili Ali Muhammad Naini ma’lum qilishicha, Eron Qurolli kuchlari kamida olti oy davomida intensiv jangovar operatsiyalarni amalga oshirish imkoniyatiga ega.
Uning ta’kidlashicha, mamlakat armiyasi va harbiy infratuzilmasi uzoq muddatli urush sharoitida ham barqaror faoliyat yuritishga mo‘ljallangan. IIQK vakili Eron armiyasidagi zaxiralar, logistika tizimi hamda harbiy salohiyat shunday ssenariylarga mos ravishda shakllantirilganini aytdi.
Nainining so‘zlariga ko‘ra, Qurolli kuchlar nafaqat mudofaa, balki uzoq vaqt davomida yuqori darajadagi jangovar harakatlarni olib borish imkoniyatiga ham ega. Bu esa mamlakat harbiy strategiyasida uzoq davom etishi mumkin bo‘lgan ehtimoliy nizolar ham hisobga olinganini ko‘rsatadi.
Shu bilan birga, IIQK vakili Eronning harbiy tayyorgarligi mamlakat xavfsizligini ta’minlash va tashqi tahdidlarga javob qaytarishga qaratilganini alohida ta’kidladi.
“Zamin”ni Telegramʻda oʻqing!
