Eron oliy rahbari lavozimiga marhum Oyatulloh Ali Xomanaining o'g'li Mojtaba Xomanai saylandi. Bu haqda mamlakatning oliy diniy kengashi rasman e'lon qildi. Qaror qabul qilinganidan so'ng, kengash a'zolari eronliklarni milliy birlikni saqlashga va yangi rahbar atrofida jipslashishga chaqirdi. Davlat ommaviy axborot vositalari orqali tarqatilgan bayonotda, bu tanlov qat'iy ovoz berish yo'li bilan amalga oshirilgani ta'kidlangan. Bu haqda theguardian.com xabar beradi.
Mojtaba Xomanaining tayinlanishi 1979 yilgi islom inqilobidan buyon ilk bor oliy hokimiyatning otadan o'g'ilga o'tishi sifatida tarixga kirdi. Bu holat mamlakat ichida sulolaviy boshqaruv tizimining shakllanishi borasida qizg'in bahslarni keltirib chiqarishi kutilmoqda. Eron qurolli kuchlari va parlament rahbariyati ushbu qarorni qo'llab-quvvatlab, uni diniy va milliy burch deb atadi.
Biroq, mazkur tayinlov xalqaro miqyosda keskin munosabatlarga sabab bo'lmoqda. AQSH prezidenti Donald Tramp Mojtaba Xomanaini qabul qilib bo'lmas nomzod deb atadi va Vashington Eronning kelajakdagi siyosiy yo'nalishida o'z so'ziga ega bo'lishi kerakligini ta'kidladi. Isroil harbiylari esa Ali Xomanaining barcha vorislarini ta'qib qilishda davom etishini ma'lum qildi. Tahlilchilarning fikricha, bu qaror mintaqadagi urushning yanada avj olishiga olib kelishi mumkin.
Yamanlik husiylar yangi rahbarning saylanishini islom inqilobining navbatdagi g'alabasi deb atab, uni tabrikladi. 56 yoshli Mojtaba Xomanai shu paytga qadar hech qanday saylanadigan lavozimni egallamagan bo'lsa-da, uzoq yillar davomida Eron hokimiyatining markazida faoliyat yuritib kelgan.
“Zamin”ni Telegramʻda oʻqing!
