Germaniya hukumati energiya xavfsizligini ta'minlash maqsadida gaz omborlarini shoshilinch ravishda to'ldirishga kirishdi. Eron atrofidagi geosiyosiy vaziyat va yoqilg'i narxlarining keskin oshishi Yevropa davlatlarini zaxiralarni qayta tiklashga majbur qilmoqda. Hozirgi kunda gaz narxi ming kub metr uchun 700 dollardan oshib ketdi, bu esa bozorlardagi beqarorlikni yanada kuchaytirmoqda. Bu haqda eadaily.com xabar beradi.
Ma'lumotlarga ko'ra, Germaniya gaz omborlaridagi zaxiralar so'nggi to'rt yil ichidagi eng past ko'rsatkichga tushib ketgan. Davlat nazoratidagi SEFE va Uniper kompaniyalari kuniga 45 million kub metrdan ortiq gazni omborlarga yo'naltirmoqda. Qizig'i shundaki, ushbu zaxiralarning bir qismi Rossiyadan olinayotgan gaz hissasiga to'g'ri keladi. Xususan, SEFE kompaniyasi "Yamal SPG" bilan tuzilgan uzoq muddatli shartnoma doirasida Rossiya suyultirilgan gazini qabul qilishda davom etmoqda.
Garchi Germaniya hukumati 2022 yil aprel oyida "Gazprom"ga qarashli aktivlarni milliylashtirgan bo'lsa-da, Rossiya gazi importi to'xtamadi. Ushbu gaz Fransiya va Niderlandiya terminallari orqali Yevropaga yetkazib berilmoqda. Mutaxassislarning fikricha, uzoq muddatli shartnomalar narxlar keskin ko'tarilgan bir paytda Germaniyaga arzonroq yoqilg'i olish imkonini bermoqda. Ayni damda Yevropa Ittifoqi mamlakatlari qulay ob-havo sharoitidan foydalanib, qish mavsumi yakunlanmasdan turib zaxiralarni maksimal darajada to'ldirishga harakat qilmoqda.
“Zamin”ni Telegramʻda oʻqing!
